Aen daizsaw daxboh miz aen doengjdaiz daep suj ndeu. Haemhhaemh daxboh cungj hai aen doengjdaiz daep suj de, naengh youq henz daizsaw haenx mbouj rox nyaengq gijmaz, gaenlaeng caiq cuengq doxgaiq haeuj ndaw doengjdaiz bae suj hwnjdaeuj. Mbatmbat ndaejnyi gij sing daep suj de, ndaw sim gou cix lumj deng moed raih nei, humz dangqmaz.

“Boh ha, mwngz caeu gijmaz doxgaiq ndei youq ndaw doengjdaiz haenx ne?” Mwh gou gig siengj rox ndawde miz gijmaz, gou couh cam daxboh. Hoeng daxboh mbouj naeuz gou nyi, han gou: “Ndaw neix dwg gij laepndaw gou.”

Caj daengz ngoenzseng gou seiz, gou gangj naeuz: “Gou miz gienh saeh ceiq muengh guhbaenz ndeu, couh dwg gou siengj rox ndaw doengjdaiz daxboh dauqdaej caeu gijmaz doxgaiq!” Daxboh dingq le riunyumnyum, daj ndaw daeh mbon fag yaekseiz doengjdaiz, cuengq youq ndaw fwngz gou.

Gou naep seiz haeuj conghsuj bae baenq, ndaejnyi “gada” sing ndeu, aen doengjdaiz de couh hai ndaej lo. Gou rag doengjdaiz okdaeuj, yawjraen aen habbingj loq gaeuq ndeu. Gwnz habbingj haenx veh miz duz youmui ndeu, de gaenq doiqsaek gvaq, hoeng lij riuhehe coh gou——Mwh gou doeg youwzyenz, gou ceiq haengj aen doz youmui neix.

Byaifwngz gou ngamq lax daengz aen fahabbingj de, sim gou diuq vaiqvut, lumj miz duz douq ndeu youq bakaek gou saet nei. Gou menhmenh biengj aen fahabbingj haenx hwnjdaeuj, raen ndaw hab daeb miz neb saenq ndeu. Gou fan yawj gij saenq neix, raen gwnz byuksaenq cungj veh miz doz, fukfuk doz cungj lij doxdoengz: Miz doz gou baez daih’it veh dou sam boux; miz doz duzyou gungjlungz, gou ndaejgeiq duz gungjlungz neix dwg baxboh baez daih’it soengq yougungjlungz hawj gou; miz doz veh diuz heuj daih’it gou lawh……

Gou hai fung saenq cuengq youq ceiq baihgwnz de, gij saw haenx dwg daxboh sij: “Lwg gou, ngoenzneix dwg ngoenzseng mwngz, gou muengh mwngz itcig haisim! Doenghgij saenq neix cunnj dwg gou sij hawj mwngz, gou ngoenzngoenz cungj sij saenq hawj mwngz, geiq gij saeh mwngz.”

Yawj sat, gou caiq hai lingh fung saenq yawj——

“Ngoenzneix dwg ngoenz daih’it mwngz bae doeg siujhag. Gou ndwn youq gwnz yangzdaiz, raen mwngz aemq daehsaw bae hagdangz, gou sawqmwh roxnyinh boux lwgnyez ak daej de majhung lo……”

“Mbatneix mwngz nohndat, gou umj mwngz bae yawj canghyw, mwngz gaem gokbuh gou ndaet dangqmaz, caegcaeg naeuz gou nyi: ‘Boh, gou miz di lau.’……”

“Mwngz hag gwih danci laemx, gyaeujhoq naeng lot lo, in dwk raemxda yaek doek roengzdaeuj bae. Mwngz lij cang ak naeuz: ‘Gou dwg bouxsai, gou mbouj daej ha!’ ……”

Gwj yawj gwj yawj, raemxda gou lai dwk hawj gou yawj mbouj raen dem lo. Yienzlaiz ndaw doengjdaiz neix, caeu le gij saenq daxboh sij hawj gou, de caegcaeg geiq le haujlai saeh caeuq gou mizgven.

Rumz menhmenh daj rog cueng ci haeujdaeuj, daiq daeuj le heiqrang gaugyaeq, mup hwnjdaeuj vansubsub, ndaw sim gou caemh raeujruprup.

(Yiz San’anh raiz

Veiz Munglingz hoiz)