Bat go’mbawna ndaw rug, aenvih mbouj miz ndit ciuq, mbouj miz fwn rwed, ciemhciemh reuq lo. Couh lumj gou hag diuqcag, mbouj ginggvaq lai baez haglienh caeuq daezswng, couh rox daengz byongh couh vut, baenzlawz hix mbouj ndaej guhbaenz.

Gou lienh diuqcag mwhhaenx mbouj ngaih geijlai, cungj roxnyinh gig nyapnyuk. Baeznduj, mwh gou gaem diuz cag raez, ndawsim gig ngeix mbouj doeng. Gou song da mbouj yaep dwk yawj diuzcag haenx, diuz de youq gyang fwngz daxmeh vaiqvid veh ok gij gien geq mbouj rox liux, daxmeh lumj dwk fap hawj de nei, diuzcag unqniekniek haenx yaepda couh miz sengmingh lo, miz rengz lo, bienq ndaej youh dingqvah youh manz. Daxmeh hawj gou ciep aeu diuzcag ndaw fwngz de. Gou lauyiyi nyaeb diuzcag hwnjdaeuj, diuzcag bingzbingz ciengzciengz neix dwg baenzlawz gagrox diuq hwnjdaeuj ne? Gou roengzrengz dauqngeix gij din fwngz caeuq gij saenzcingz daxmeh, lumjnaeuz cij aeu mbouj lot fwngz couh ndaej vad bae vad dauq. Gou yungh rengz baez vad, diuzcag daj baihlaeng vad daengz baihnaj, gou haenqrengz baez diuq, hix mbouj rox gizlawz miz gyaeugyan(vwndiz), “bap” sing ndeu gou gvihlaemx youq gwnz namh, song fwngz daeux youq gwnz namh in ndaej manhsadsad, gou hozndat dwk vut diuzcag deuz, ndaenq dwk raemxda roengzbyoegbyoeg.

Miz vah naeuz “deng duzngwz haeb gvaq, raen gohaz hix lau”. Gou aiq dwg lau diuzcag neix lo, gvaqlaeng youq gwnz hozdunggo, dou da yawj diuzcag neix cix mbouj gamj haeujgyawj, cigdaengz dingqnaeuz “doenggeiq sam hangh” doxdax aeu beij diuqcag, gou cij naemj : Mboujne gou caiq sawq baez ndeu. Doengzhag bouxboux daeuj gujli gou, gou youh gaem hwnj diuzcag diuqcag. “Sien vad caiq diuq, sien vad caiq diuq”, gou doq damz, doq yaengyaeng dawz diuzcag vad bae baihnaj. “Youh diuq mbouj gvaqbae!” Gou gag damzboedboed. “Mbouj youqgaenj, caiq sawq baez dem ba!” Doengzhag raen gou mizdi doeknaiq, gujli naeuz. Couh yienghneix gou sawq baez ndeu、song baez、sam baez…… Youq laj ndithaemh, duzngaeuz iqiq baez hwnj baez roengz saet dwk, singriu lumj singlingz nei cienz doh ndaw hagdangz.

Youh gvaq song ngoenz, doengzhag heuh gou itheij diuqcag, gou angqfwngfwng dwk dapwngq lo, hoeng sim diuqbubbub. Doengzhag fwngz rag diuzcag, heuh gou ndwn daengz doiqnaj de: “Raeuz guhdoih diuq ba. Gaej lau, gou heuh diuq raeuz couh itheij diuq.” Gou ngaekngaek gyaeuj, mbouj gamj yawj coh diuzcag, hix mbouj gamj yawj coh lwgda de. Laepda haeujsim bae dingq de geqsoq: “It, ngeih, diuq! ” Gou haenqrengz baenz saet, “mbouj laemx, gou gvaq lo, gou rox diuqcag lo!” Gou angq dwk hai song da, got dawz doengzhag baenqgien hwnjdaeuj, youh angq dwk laebdaeb diuqcag, “ It, ngeih, diuq! It, ngeih, diuq……” Lau dwg gij raemxda gikdoengh myoxmywd song da, gou raen diuzcag diuqcag gaenq bienqbaenz duzdoengz, hopheux youq henz ndang gou.

Gou dawz go’mbawna ndaw rug senj daengz ndaw suenva bae, aenvih gou rox, cij miz ginggvaq rumz ci fwn rwed, sengmingh cij bienq ndaej hoenghfwgfwg.

(Dangh Yezlinz raiz Yiz Ciz hoiz)