Faggvak dwg boux ak gaenx guhhong ndeu.

Ranz de mboujlwnh bouxlaux lwgnyez，daj iq couh gaenx guhhong. Mboujlwnh cin hah cou doeng nditndat fwndoek，cungj bae guh hong mbouj daengx gvaq. De ciengzseiz geiq coenz vah ciuh bouxlaux bouxgeq naeuz——Gaenx mbouj fat goj miz, gik mbouj dai goj iek; cawzcin mbouj guh hong, cawzdoeng couh gwn rumz…… Ndigah，ranz de gaiqgwn rim cang，gwndaenj mbouj heiq gvaq. De lij ciengzgeiz son lwglan doeg saw……

Aendaengq dwg boux ceiq gik ndeu, yiengh maz goj mbouj ndaem, daengx bi mbouj bae guhhong gvaq! Lau ndit lau fwn、 lau naiq lau dai. Ndaw ranz ciengzseiz mbouj miz haeux roengz rek, ciengzseiz naj mbouj aeu bae ranz faggvak cam gwn.

Ngoenzneix, de youh yaek bae ranz faggvak cam gwn lo. De byaij daengz henz ranz faggvak, couh dingqnyi faggvak son lwglan de doeg saw naeuz:

“Miz naz mbouj raeq ndaw mbung hoengq,

Miz saw mbouj doeg lwglan vaj;

Cawzcin sam nyied mbouj roengz goeng,

Cib it ndwenlab couh ndoet rumz.

……”

Aendaengq dingq le, couh mbouj miz naj caiq byaij haeuj ranz faggvak bae cam gwn lo.