Gij ronghgim seizcou ndaw da gou, mboujdan miz gij haeuxnaz gimnyamnyam laj din Bya- daengngoenz, lij miz gij mbawraeu nding lumj feiz gwnz roen daj hagdangz ma ranz haenx. Diuz roen neix gou byaij lai byaij raeuh, moix baez cungj fatyienh gij gyaeundei mbouj doxdoengz de. Gou byaij gvaq gij heu seizcin, hix yawj gvaq gij henj seizcou; dingq gvaq duzbid heuhceuceu lajbya, hix mup gvaq gij vahom heuh mbouj ok mingzcoh haenx. Aen hagdangz dou couh naengh youq laj din Byadaengngoenz, caen dwg gyaeusisi hawj vunz ngonz mbouj gaeuq, neix caen dwg gienh saeh caijsoq ndei ndeu ho!

Ngoenzneix dwg ngoenz ceiq hoj lumz ndeu. Hagdangz dou gawjbanh “Conzdungj Vwnzvacez” Gaiq Daih- it—Doxdax Doeg Saw Ndei Cunghvaz. Doxdax gaxgonq, dou nyinhcaen baizlienh gvaq baez youh baez, yienznaeuz gou cijdwg gyoengqdoih ndawde boux ndeu, hoeng lauxsae naeuz moix boux vunz cungj gig youqgaenj, daihcaez cungj yunghsim bae doiqdaih baez doxdax neix.

Gwn haeuxringz gvaq, couh daengz seiz ceiq gaenjcieng haenx lo, dou daenj ndei buh henjrangrang ndaw ban, dajcang veh naj ronghmyigmyig. Seizgan couh lumj naenx aenvaiqhaeuj densigih nei, yaep he couh lwnz daengz aen ban dou hwnj daiz biujyienj lo. Gou sim diuqbubbub byaij hwnj gwnzdaiz, caeuq gyoengq doengzhag itheij cuengqsing doeg sei—《Nyezrauh Seizdaih Moq》. Baez doeg daengz seiz “youq gwnz cauhcangz gvangqmieng, dou biuok raemxhanh, vih aeumiz ndangdaej cangqheiq bae ciepsouh deuqnyex daengzcog” haenx, Vangz Yi caeuq Buz Lanzsingh ndaw ban dou lij guh longhfoux biujyienj, yaepyet gwnz cauhcangz couh nauhyied hwnjdaeuj. Doeklaeng aen ban dou bingz ndaej daih’it mingz.

Cuengqhag ma ranz, byaij youq gwnz roen ngoenzngoenz byaij gvaq haenx, gij rumzcou doiqnaj ci daeuj haenx cungj diemzsubsub. Duzroeg lumjbaenz doiq dou naeuz: “Sou caen rem!” Goengq Byadaengngoenz sangsoengsoeng haenx hix lumjbaenz riunyumnyum ngonz gou, doiq gou naeuz: “Lwgnyez rauh, laebdaeb roengzrengz bw!”

Gou naemj hagdangz gawjbanh gij hozdung conzdungj vwnzvacez neix, mbouj couh dwg youq seiz geiqciet dajsou neix mbebaij gij cingzcik nyezrauh seizdaih moq ha? Dou mboujdan hagsib ciuhgeq, engq aeu hagsib bonjsaeh moq, baijok gij yienghndei nyezrauh seizdaih moq. Cograwz, caiq roengzrengz bae guh, gou itdingh guhbaenz boux nyezrauh seizdaih moq engq maenhndei ndeu!

（Dangh Cauzgoh raiz Yinj Fuzgen hoiz)