Rumz ndwenloeg ci gvaq byai gyaj seiz, youh swnhfwngz bae bueddoengh gij gimzyienz saedceij. Naed raemxraiz douh youq byai mbawmeg haenx, dwg gij sawyoux nditromh sij hawj daihdeih; vaiz geq hoiz bak geux nywj, rox dag seizgan gvaq gij ngaeuz daengngoenz bakmbanj. Gou dawz aen daengq faexcuk caeuq seiz lwgnyez daeuj, naengh youq henz daemz yawjngonz ndwenloeg lajmbanj.

Raemxdaemz lumj gij nyawhheu deng nu soiq, hapraemx nyoengx gobiuz sij sei. Daegnuengx daenj haizbaengz caij soiq gij ngaeuz fwj gwnz namh, duzbid doeksaet dwk swenj geij sing. Nditndat ciuq haeuj gok buh de bae, rin iq gveng gvaq gwnz raemx veh ok diuz sienq gungj ndeu, caen lumj aen swngjlozhau seiznyez youq ndaw diuzdah seizgan gveng roengzbae haenx. Baih hamq doiqmienh, sing saeg buh caeuq sing roeg heuh gwnz gofaex doxgap, govaiz geq saenq gij ndit geh mbaw soiq liux, youq ndaw byoemhau daxbuz saeg buh haenx roix baenz roixcaw.

“Yawj, aeu yienghneix hawj lwgrin mbin hwnjdaeuj.” Daegnuengx ndang goz lumj ronghndwen, gaiq rin iq youq gyangfwngz gveng okbae haenx, mboujdan dwg rin, engq dwg gij gvaigvetgvet seiznyez. De son gou doeg gij vah ndaw raemx: Gij rinbenj oiq dwg douhau, raemx fubfeb dwg yinhgiek, gij rin caem youq ndaw raemx dwg coenz vah. Boux lwgnyez soh oiq neix, youq henz daemz caemz bopraemx, guh dwk gig miz eiqsei.

Bouxguhnaz daenj mauhnyangj youq ndaw doengh gohaeux nyaengqdidi, yaep raen yaep mbouj raen, hanh doek youq gwnz namh, lumj yaek heuh singj senggei lajnamh, lumj dingq ndaej nyi gij sing gohaeux did ok namh yienghneix. Aen hwet gungj gyoengqde, caeuq gij gungj daegnuengx ndek rin roengz raemx haenx, youq laj ndithaemh doxlumj caez. Gou sawqmwh roxnyinh, gij hongnaz ngoenzngoenz guh haenx cungj dwg gij seiyoux daihdeih， sing dub buh dwg bingzcaek, faggvak hwnj roengz dwg dingzdwd, lienz gij cezcou aen lingz gwnz hoz duzvaiz geq bibi buengqbuengq haenx, cungj dwg vih gij sei daihdeih dwk ok yinhlwd.

Saek banhaemh ciuq roengz henz daemz seiz, daegnuengx mbouj caiq naemj son gou dwk hapraemx. Dou geq gij ndaundeiq ndaw raemx haenx, dingq gij rumz banhaemh ci gvaq doenghnaz haenx. Ronghrib youq ndaw《Seiging》mbin okdaeuj, rongh daengz gij saw Dauz Yenhmingz. Seizneix aen mbanj lumj gaiq nyawh nei unqswnh, dawz gij gyukcauz caeuq youheiq daengxcungq daih bae liux.

Gyoengqvunz biek mbanj bae gyae cungj gyaez dawz gij cingz ranzmbanj dwk roengz daeh daiq bae, hoeng cix mbouj rox, gij ndiepniemh ranzmbanj ndaw sim haenx lumj fuk doz nei seizseiz ndaej mbehai. Danghnaeuz mwngz youq ndaw ndoeng ganghginh ra mbouj raen roen, ndaejgeiq daeuj henz daemz neix naenghnaengh. Hawj gij raemx seuqsat, bang mwngz cam aeu gij simnduj deng lumz haenx; hawj gij sing gveng rin roengz raemx, gyaepdeuz gij mbwq ndaw sim. Raeuz dauqdaej dwg gyoengq lwg daihdeih, ciq gij soem naed meg, caiq ra gij soemraeh sengmingh gaxgonq ma ba.

(Cwngh Swhyij raiz Luz Lilanz hoiz)