Moix haemh cuengqhag ma ranz, gou cungj caeuq duzngaeuz gou guhcaemz yaep ndeu. Gou byaij de hix byaij, gou saet de hix saet. Miz ngoenz ndeu, gou gingqyienz raen de rox diuqfoux!

Ngoenzhaenx gwn caeuz sat, gij lohdaeng gyanghongh aenaen cungj rongh lo. Gou youq ndaw hongh gyaep duzngaeuz buet. Buet ha buet ha, gou daengx roengzdaeuj yietbaeg. Siengj mbouj daengz, duzngaeuz gwnz dieg mbouj daengx, de ndiengq din, lumj duz mbungqmbaj nei mbaeumbengmbeng baenq gien diuqfoux, duzngaeuz iqetet de yaep raez yaep dinj. Gou maeuq roengzdaeuj, sing iq cam:“Ngaeuz iq, mwngz baenzlawz gag diuqfoux ha?”

Duzngaeuz iq daengx roengzdaeuj, ndang miz di bibuengq, gou lumjbaenz dingqnyi gij sing nyaeq de:“Aenvih ndithaemh ngoenzneix gyaeu lai lo, rumz hix iq, gou ngah diuqfoux lai lo.” Gou angq dwk ndwn hwnjdaeuj, caeuq de itheij diuqfoux. De gvaq swix, gou hix gvaq swix; de dik ga, gou hix dik ga…… Ronghndwen ciuq gyanghongh rongh cancan, dou yaep ndeu doxgek, yaep ndeu doxsoeb, lumj doiq youx diuqfoux habngamj ndeiraeuh ndeu.

Cijaeu sijsaeq cazyawj, couh rox henzndang gizgiz cungj miz gingheij. Duzngaeuz neix mbouj dwg duzngaeuz ndaemndwt bingzciengz ndeu, cixdwg duzngaeuz rox diuqfoux baenz baengzyoux ndei gou.(Vangz Gingswngh)