Aen ndeu dwg gyaeqgaeq byotnyieg, aen ndeu dwg deihgiuz hung’ak. Danghnaeuz aeu aen gyaeq- gaeq bae daem aen deihgiuz, mwngz rox siengj daengz gijmaz ni? Mbangj lai vunz cungj dwg mbouj siengj gijmaz couh sikhaek naeuz: Gyaeqgaeq haengjdingh soiq liux. Hoeng, ciengz saedniemh ngoenzneix, dauqfanj hawj gou doiq aen vwndiz neix miz gietlwnh moq.

Singlingz hwnjdangz ngamq yiengj, lauxsae saenzmaed dwk byaij haeuj gyausiz, riunyumnyum dwk naeuz: “Gyoengq doengzhag, ngoenzneix raeuz guh aen saedniemh mizyinx ndeu, mingzcoh heuh ‘gyaeqgaeq daem deihgiuz’.” Dingqnyi aen mingzcoh geizgvaiq youh daegbied neix, ndaw gyausiz sikhaek bienq ndaej nauhyied raixcaix, gyoengq doengzhag mwngz gangj neix gou gangj haenx cenglwnh foedfoed, gwnz naj cungj hoij rim haengjheiq caeuq geizgvaiq.

Ciepdwk, lauxsae naeuz gij gvicaek doxdax: “Aeu ceijgaen、faiq、bauqceij daengj gak cungj caizliuh daeuj duk aen gyaeqgaeq le, yungh gij fuengsik doekroengz hawj aen gyaeqgaeq bingzonj doek youq gwnznamh. Aen gyaeqgaeq byawz ndaej mbouj vaih saek di, ndei lumj gaeuq, byawz couh ndaej hingz.” Dingqnyi gij gvicaek neix, ndaw gyausiz heiqfaenh engqgya nauhyied lo, vunzlai cungj vidgen vidga, fwngz humz raixcaix.

Sawqniemh hainduj lo! Gou siujsim riri dwk dawz gij caizliuh bwh ndei neix okdaeuj, aeu gij faiq unqnem haenx duk aen gyaeqgaeq maenh ndaet gonq, lumjbaenz daenj caengz buhfuengzre nana ndeu hawj de. Ciepdwk, gou youq ndaw aen habceij demh bauqceij caeuq gaenceij, dawz aen gyaeqgaeq duk ndei neix yaengyaeng cuengq roengzbae, caiq aeu saigyau fung ndaej youh ndaet youh maenh. Doeklaeng, gou lij aeu aen daehsuliu saeknding ndeu guh baenz aen liengjgyangqroengz ndeu, ding youq gwnz habceij maenhmaenh bae. Gaiq fuengzre aen gyaeqgaeq gou cungjsuenq guhbaenz lo! Yawj aen “lwggyaeq” saeqsim guh neix, ndaw sim gou cungj saek rim maqmuengh.

Daengz seiz vut gyaeqgaeq lo. Gou umj aen “lwggyaeq” daeuj daengz baihnaj conghcueng, seizneix, gou simdiuq bubbub, lumj ndaw fwngz mbouj dwg gaem gyaeqgaeq, dauqdwg gaem aen cadan mbouj rox seiz lawz dek ndeu. Gou yawj roengz baihlaj bae, raen gwnznamh lumjbaenz gek daegbied gyae nei, sikhaek gyaeujngunh daraiz lo, gou nyaenx mbouj ndaej caegcaeg youq ndaw sim damz: “Rumz ha, seizneix cienfanh gaej daeuj daujluenh bw!” Dingqnyi gyoengq doengzhag cungj gujli gou, gou okrengz diem amq heiq he, couh menhmenh cuengq fwngz lo. Aen “lwggyaeq” gou youq gyangmbwn lumjbaenz diuqfoux nei, youh baenq aen gien ndeu le, cij bibi buengqbuengq dwk mbin roengz gwnznamh bae. Aen sim gou caemh gaen de baez hwnj baez roengz, cungj mbouj an’onj saek di. “Boeb” sing yiengj ndeu, gyaeqgaeq doek youq gwnznamh lo. Gou doq vaiqvit cung roengz laj laeuz bae, cibfaen saeqsim baez caengz baez caengz bokhai gij fuengzre. Mwh yawjraen aen gyaeqgaeq haenx mbouj vaih saek di, ndeindup lumj gaeuq ninz youq ndaw “moeg”, gou gikdoengh dwk angqhemq hwnjdaeuj: “Guhbaenz lo, gou guhbaenz lo!” Seizde, gij gaenjcieng caeuq yousim doq baez dog sanq liux lo.

Gyaeqgaeq daem deihgiuz, gij saeh yawj hwnjdaeuj lumj mbouj hojnaengz guhbaenz neix, dauqfanj ginggvaq dou roengzrengz le caen guhbaenz lo. Doenggvaq gienh saeh neix le gou cij roxyiuj: Gwnzbiengz mbouj miz gijmaz mbouj bienq daengznauq, cijaeu raeuz gamj sawqniemh, miz damjliengh cauhmoq, couh itdingh ndaej cauh ok gij saeh mbouj bingzciengz swhgeij guh haenx! (Louz Cinhboz raiz

Liengz Cauzcieng hoiz)