“Ding lingz lingz, ding lingz lingz……”Aen nauhcung youh caiq baez yiengj hwnjdaeuj lo.

Gou fwt daj gwnz mbonq naengh hwnq, baez yawj nauhcung, sawqmwh swenj sing ndeu:“Mbouj baenz lo, caiq mbouj hwnqdaeuj, couh yaek daengzgvaiz lo.”

Gou vuengmuengz swiq naj cat heuj, fwngz nyaengq din luenh longz buhhagdangz hwnj ndang, fwngz ndeu gaem aen menbauh daxmeh senq ce hawj gou haenx, fwngz ndeu riuj daehsaw hwnjdaeuj, couh cung roengz laeuz bae.

Gij rumz haetromh miz di liengz, ci hawj gou saenzdwddwd. Youq gwnz haw hung, vunz bae vunz dauq, gou doq buet doq nyapnyuk, caeux rox yienghneix, couh wnggai caiq diuz sing nauhcung yiengj di dem.

Cienj gvaq diuz gai he, vunz noix haujlai, gou couh gyavaiq yamqdin.Sawqmwh, gou raen baihnaj miz aen ngumhngaeuz hwetgoz ndeu, byaij gyawj baez yawj, yienzlaiz dwg daxbuz byoemhau ndeu, de cingq saenzdedded nyoengx aen cisamloek cang doxgaiq feiq ndeu.

Loekci loemq roengz gumz henz loh bae, daxbuz geq haenqrengz nyoengx aen ci, hoeng doi geij mbat cungj mbouj doi ndaej doengh.

Gou yawj aen biuj, liz caet diemj lij ca ngeih cib faen cung. Danghnaeuz dingz roengzdaeuj bang, gig gojnwngz daengzgvaiz.

Hoeng……gou haebhaeb heuj, “daengzgvaiz couh daengzgvaiz, gou mbouj ndaej bungz daengz cungj saeh neix couh buetdeuz ba! Bouxlawz heuh gou cingqngamj bungzraen gienh saeh neix ne? Buet, gou coengzlaiz mbouj yienghneix guhvunz ha!” Siengj daengz neix, gou couh buet gvaqbae.

“Daxbuz, gou daeuj bang mwngz ba!” Gou iet fwngz bae fuz gaiqdam cisamloek.

Daxbuz miz geij faen angq, youh miz di doeksaet dwk yawj gou:“Mbouj yungh la! Mbouj ndaej nguh mwngz, mboujne mwngz bae hagdangz couh daengzgvaiz lo. ”

“Mbouj youqgaenj, mbouj youqgaenj, cuengqsim lo! ”

Yienghneix, dou itheij yungh rengz doi cisamloek, yienznaeuz gig gannanz, hix gig menh, hoeng doeklaeng gou caeuq daxbuz doengzcaez roengzrengz le, doi ci ndaej hwnj aen gumz daeuj lo.

“Docih mwngz, dahsau iq!”

“Mbouj guhhek, daxbuz, mwngz menh di!”Gou bang de dawz gij siengceij nyungq doek haenx cug ndei, da soengq de bae gyae, caiq yawj aen biuj, “mbouj ndei, caiq mbouj buet vaiq di, caen yaek daengzgvaiz lo……”

Gou gipmuengz buet bae hagdangz. Daengz bakdou hagdangz, gij hagseng laebdaeb haeuj hagdangz haenx gaenq mbouj lai lo.

Seizneix, ndaw sim gou yienznaeuz miz cibngeih faen simgip, cix gag miz cungj diemzvan ndeu saek rim bae……

Cung haeuj gyausiz, gou myaeg aen cung venj gwnz ciengz da ndeu:“Haha, 7 diemj cung, ngamqngamq ndei!”

Dangz doegromh hainduj le, gou doq doeg saw, doq gag siengj, ngoenzneix ngamq ndei bungz daengz gienh saeh neix, couh suenq daengzgvaiz lo, bangcoh bouxwnq hix dwg gig miz yiyi.

(Ciz Cauznganz raiz

Loeg Haijdaek hoiz)