Mbaet Makdauz

Laeng ranz ranzcoj gou miz go makdauz ndeu, baez daengz seizhah, gwnz go cungj baenz mak rim liux.

Sujgyaj ngoenz ndeu, gou caeuq daxgoeng yaek mbaet gij makdauz gwnz go. Daxgoeng daj ndaw ranz dawz aen laefaex ndeu okdaeuj, ing haeuj godauz bae nda ndei, heuh gou bin hwnj lae bae, hoeng gou mbouj gamj. Doeklaeng daxgoeng nai gou youh rex gou, gou cij bin daengz dingj lae, mbaet aeu aen makdauz youh hung youh hoengz ndeu.

Gou roengzdaeuj le, daxgoeng youh bin hwnj lae bae. Daxgoeng youq gwnz mbaet, gou youq laj aeu lamz deq, yaepyet makdauz couh rim lamz lo.

Baezneix mbaet makdauz, gou baez daih’it bin lae, baez daih- it daj gwnz gomak mbaet aeu lwgmak, hawj gou geiqndaej maenhmaenh bae.

(Vangz Yinyenz)