Aen Ronghndwen Diegcoj, Ngamqngamq Baenz

Aen ronghndwen haemhneix hausagsag, ndaundeiq cungj ndojdeuz lo. Gij ronghdaeng ndaw fungh ranz, baenzlawz cungj rongh mbouj gvaq aen ronghndwen diegcoj.

Muenghyawj aen ronghndwen, gou dauqngeix daengz aen cin iq baihnamz. Ndaw cin miz mbangj diuz gai lij caengz bu lizcingh, saekseiz miz cisamloek loh gvaq, gwnzgai couh foenqgoedgoed. Gij ranzlaeuz ngamq hwnq haenx doxlienz baenz rangh, ndwn youq diegsang ciq gij rongh ronghndwen muengh bae, ronghdaeng migmyanz lumj duz lungz raez ndeu.

Ranz gou miz aen suen ndeu, ndaw suen ndaem miz godauz iq, godauz mbouj suenq sang, diuz ganjfaex daemqded gozged, mbouj did ok geijlai ngefaex, hix mbouj dawz geijlai gij lwgmak oiqem’em haenx. Baeznaengz ma daengz gizneix, gou cungj genj ngefaex co ndeu, dawz aen daengloengz hoij youq gwnzde.

Mbwn laep le, diemj aen daengloengz, feizmbaw youq ndaw haeuzdaeng diuqfoux, ciuqrongh lengq mbaw vadauz gwnz ngefaex, ciuqrongh baenz hwnz baenz hwnz laepngaungau, hix ciuqrongh le diuzloh gou ma ranz haenx.

Gij banhwnz seizhah ceiq gyaeundei, mbwn laepngaungau, caemrigrig, miz haujlai ronghrib diuqfoux fefe. Duz mahenj hen dou ranznden cix mbouj lumj doengxngoenz baenzlai angq lo, aen ndang boemz youq henzdou, iet linx ngebngeb cimyawj gij vunz byaij gvaq henz ndang de. Seizhaenx gou couh riengz daxbuz ninz youq gwnz eijgaeu ndaw dangzhongh, rumzhaemh cififi, byoemgyaeuj mbinsisi, eijgaeu ngauzngednged, ndwenngoenz caem ndei, seizgan lumjbaenz youq seizneix menh roengzdaeuj lo.

Miz eijgaeu yiengj ngi’ngi ngednged bang gou cwdangj, gou laeglemx bin hwnj gwnz bo iq laeng ranz bae, gwnzdieg lij louzmiz gij mbawfaex siksanq haenx, gizneix dwg gizdieg gou doengxngoenz caeuq gyoengq nyezdoih guhcaemz gvaq. Gou buenz ga naengh youq gwnzdieg, ngiengx gyaeuj muengh coh gwnzmbwn, couh deng aen ronghndwen gozgemgem haenx ciuyinx lo.

Ronghndwen caen gyaeundei, caen saenzmaed ha, cienbak bi daeuj miz haujlai boux doegsaw guh sei haenh de, lauheiq dwg aenvih de miz rongh miz laep, miz luenz miz vauq, boux vunz raizsei ciq gijneix daeuj danqhaenh gij cingzniemh diegseng haenx. Lij Bwz sij miz 《Youq Laj Ronghndwen Gag Ndoethaeuj》, caeuq ronghndwen guhdoih, mbehai gij cingsaenz seiqgyaiq godog cwxcaih de; laj bit Suh Siz raiz miz 《Suijdiu Gohdouz》 dawz ronghndwen beij baenz gij vunzseiq bienqvaq mbouj dingh haenx, biujdap aensim langhhai de. Gou sawq muengh coh ronghndwen diegcoj, muengh coh moix it conq namhdoem diegcoj, gamjsouh gij cingzngeih ndiepgyaez diegcoj haenx, sawqmwh, aendaeng ndawsim gou deng diemj rongh lo.

Seizgan lumj maxlwg gvaq gemh, ndwenngoenz lumjbaenz aen gyangq seiziq boenz gvaq haenx, deng diuzbien fad dwk, lumj mbin nei baenqlulu, caengz ndaej yawj cing couh baenz gij saehgonq lo. Gou dauq dandog geiq ndaej dangzhongh、daxbuz caeuq aen ronghndwen. Gij rongh ronghndwen cik youq gwnz ndang gou seizde, gij dauqngeix haenx couh youq ndaw sim gou swng hwnjdaeuj, diemj rongh moix aen hwnz laepgogo gou, gyaepdeuz gij ngaeuzraemh ndaw sim gou.

Diegcoj dwg gizdieg dou seiziq siengj deuzbae haenx, dwg gizdieg dou seizgeq siengj dauqma lauheiq gaenq dauq mbouj ndaej haenx.

Youq seizhaenx、dieg haenx, yawjraen aen ronghndwen diegcoj, yienghyiengh cungj ngamqngamq baenz.

(Cuh Gucinh raiz Yinj Fuzgen hoiz)