Gij Hanh Boux Dawzrap Gwnzbya

Sujgyaj bi’gvaq, gou caeuq daxboh bae bin Byavangzsanh.

Dou naengh lamxci hwnj bya gonq, roengz ci le, couh byaij din hwnj Gvanghmingzdingj bae. Youq gyang roen bin bya, gou bungz daengz boux rap baufug hung ndeu, de hanh rim gyaeuj, yawj hwnjbae naet raixcaix, gou raen gig ngeizvaeg. Daxboh naeuz:“De dwg boux dawzrap gwnzbya.” Haidaeuz, gou naemj boux dawzrap gwnzbya caen ndei, ndaej canh cienz vanzlij mbouj sai cienz couh ndaej bin bya. Hoeng ndaw rap baufug de cungj miz gijmaz doxgaiq ne? Gou naemj dwk. Gvaqlaeng, gou baegfofo, hix mbouj caiq miz rengz naemj engq lai lo.

Yaek daengz banringz, dou dauqdaej bin daengz Gvangh- mingzdingj, dajsuenq youq aen diemqgwnhaeux henzgyawj gwn ngaiz, dou dep lwgsai iq caeuq meh de naengh roengzdaeuj. Cij raen lwgsai iq ciengj dawz danbyaek, vix gij byaek gwnz danbyaek, cauznauh:“Gou yaek gwn gijneix, gijneix, lij miz gijneix……”Daxmeh de mbouj cinj, naeuz：“Mbouj baenz, mwngz diemj daiq lai lo.”Lwgsai iq dingq gij vah daxmeh le miz di mbouj angq lo, ndaw bak cauznauh:“Gou siengj gwn lij mbouj hawj diemj lo.”Daxmeh de gienq de naeuz:“Gij doxgaiq gwn gizneix cungj dwg boux dawzrap gwnzbya baez di baez di rap hwnjdaeuj ho……”

Dingq daengz “boux dawzrap gwnzbya”gij cih neix, gou fwt siengj daengz haxbaenh bungz boux dawzrap gwnzbya haenx——Gouh haizbaengz uq naezboengz、 geu buh hanh dumz doh、diuz hwet deng rapnaek at gungj, moix baez yamq din cungj saenzfwdfwd, lumjbaenz sikhaek couh laemx nei, hoeng de vanzlij yungh rengz baez mbaek baez mbaek lae cengq hwnjbae, caeuq boux dawzrap gwnzbya daenj buhmbangjmbaek hoengz Fungz Yicaiz sienseng sij haenx mbouj doxlumj saekdi. Seizneix, gou cungj suenq rox lo, gwnz bya gij doxgaiq gwn caeuq gij doxgaiq ngoenzyungh cungj dwg gyoengqde baez di baez di rap hwnjdaeuj ha! Haidaeuz lij hozhaenz gyoengqde mbouj yungh sai cienz ndaej bin bya, yienzlaiz saehcingz mbouj lumj gou siengj yienghde ha——Guh boux dawzrap gwnzbya dwg dwgrengz ragwn ha!

Daxboh lumjbaenz yawj ok gou naemj gijmaz, naeuz:“Siujyei ha, ‘byawz rox ngaiz ndaw vanj, naed- naed cungj dwgrengz.’ Raeuz hix mbouj ndaej sai haeuxgwn, gijde dwg nungzminz sai rengz lae hanh guh ndaej daeuj hw, gwnzbya gij doxgaiq gwn caeuq doxgaiq yungh hix miz gij hanh boux dawzrap gwnzbya ha!”

Seizde, gou rox liux gij haeuxgwn gwnzbya ndaej daeuj mbouj ngaih caeuq gij gwndaenj boux dawzrap gwnzbya mbouj ngaih, ndigah, raeuz engq wnggai insik gij gwndaenj seizneix. (Giuh Swjyei raiz Veiz Yen’gyangz hoiz)