Faen Makbug

Soemj van soemj van, faen lwglan mbouj doh, faen gyahoh mbouj daengz, baenzlawz guh caengh(cij) ndei, baenzlawz vei(vix) caengh bingz, miz sim faen hawj boh, miz hoz faen hawj meh, lwgnyez gwn baezlaeng.

Gaeb Ronghrib

Duz ronghrib, gip daeuj ndongq, bongh haeuj ranz yahcin, mbin haeuj ranz yahmaiq, yahmaiq haep dou haeuj, lwgnyez daeuj guhcaemz, daeuj guh saengz guh meih.

Cingj Duzmoed Gwn Doenghyiengh

Moed nengz neix, vaiq doxnaeuz, daeuj guh donq, ndonj okdaeuj, daeuj gwn laeuj gwn noh, daeuj gwn nyinz Bohloij , Bohloij mbouj gwn lai, ce gaiq ga hawj boh, ce gaiq noh hawj au, au guhnyah mbouj gwn, dawz hwnj mbwn bae daej, aeu mbawfaex guh rongz, ok ndaej geij aen gyaeq, dawz bae Hawraeq gai, gai ndaej geij maenz ngaenz, gwn duix faenj gaxgonq.

Fwndoek

Fwn doek lo yahnax, byajraez lo yahdaiq, ndaem faiq lo goengda, ndaem naz lo vunzlai, gumq baiq mbwnngetnget.

Muengh Fwndoek

Fwn fwn, doek lo fwn, cingq(cij) ndaej gwn raemxmboq, cingq ndaej boq loxlez, cingq ndaej sez(saz) haeuxdaeq, cingq ndaej raeq haeuxnaz, cingq ndaej dax haeuxmeg, cingq ndaej cek faengxduh, cingq ndaej luh(cawj) faengxmbaet, cingq ndaej gaet faengxbuenq, cingq ndaej don lwggva.