Ranzmbanj gou youq Yangzsoz, gizde mboujdan miz byaraemx maezvunz, lij miz makbug sahdenz ndeigwn.

Mwh rumzcin ci gvaq daihdeih, gwnz nga gobug gaenq deihdwddwd maj rim mbaw heu. Youq benq heuswdswd neix, yo miz geij diemj saekhau. Byaij gyawj baez yawj, haenx dwg vabug! Gij va haenx miz di lij dwg lupva, couh lumj baenz aen baenz aen dienhdaeng; miz di gaenq hai hoengh, limqva hau baenz nyup humx dwk simva henj, couh lumj boux yenjyenz bahleizvuj ndang daenj vunjsahau nei. Laihnaeuz limqva makbug mbaeumbengmbeng, yaengyaeng baez lumh, cij fatyienh gij limqva nanwdnwd, lumj nyawhhau deng raemxraiz cimqnyinh gvaq nei. Rumz iq ci gvaq, baenz nyup baenz nyup va gwnz faex riengz rumz ngauznged, couh lumj aenlingz venj nei.

Seizgan gvaqbae mbouj dauq, seizhah daengz lo. Va loenq lo, baenz aen baenz aen makbug iq heuseuseu mauh okdaeuj. Gyoengqde couh lumj lwgsien manz ndeu, youq ndaw mbawmbaw nga’nga mwncup guh yahndoj. Miz di ndoj youq laeng mbaw, mbouj siujsim loh buenq aen gyaeuj daeuj; miz di gaenjgwt gaemdawz ngafaex, siujsim lili muengh coh baihrog; lij miz di sam haj baenz bang caenx youq itheij guhdoih, lauheiq deng fatyienh lo.

Seizcou daiq gij angq demsou caegcaeg daeuj daengz. Makbug gwnz faex lumj dingq seizcou heuh nei, baenz aen baenz aen caemrwgrwg venj gwnz nga. Gyoengqde mizmbangj heuswgswg, mizmbangj bienq baenz le saekhenj. Bouxndaemmak yawj makbug rim faex, najriu ronghsagsag, sinhoj baenz bi cungjsuenq miz muengh ndaej sou lo. Ndaw suenmak, bouxndaemmak nomj benz hwnj aenlae bae, siujsim lili dakdawz makbug, raed goenq gaenz lwgmak; boux youq laj ngiengx gyaeuj yawj, doq mbehai bak daeh, maenhmwt ciep dawz makbug gveng roengz- daeuj haenx. “Ciep maenh lo!” “Aen neix caen hung!” Sing angq caeuq sing makbug doek daeh, gap baenz le diuz gyauhyangjgiz fungsou.

Yawj ndaej gou ndwnj myaiz ndoetndoet, daxboh genj aen makbug henjgim ndeu. De suglienh dwk youq gwnz naeng makbug heh geij mbat cax, bok naeng, fwt nyouq daengz raq heiqhom makbug singjsien ndeu. Gou ciep gvaq limq makbug daxboh ndenq gvaqdaeuj haenx, bok hai naeng, yawjraen nohmak ndongqdikdik. Caj mbouj gib dwk gwn gaemz ndeu, raemxmak diemzvan lumj raemxmboq, dumh gvaq linx, gyod roengz hoz…… Gou nyaenx mbouj ndaej danq naeuz: “Neix couh dwg gij saenzcingz ceiq diemz mbwn namh soengq hawj raeuz ha!”

Gij makbug sahdenz couxyo gij byaraemx gyaeundei Yangzsoz, suek- dawz gij feihdauh seiqgeiq doxlwnz. Gou roxnyinh, gij gyaeu Yangzsoz mboujdan youq byaraemx lumj veh haenx, lij youq ndaw hom makbug neix. (bouxraiz: Gauh Suihungz bouxhoiz: Nungz Cinfung)