Mbanjranz gou dwg aen mbanj iq ndeu, gizhaenx miz diuz dah’iq raemx sawdikdik ndeu. Dah’iq couh lumj diuz baengzcouz saekloeg nei, hopheux aen mbanj iq gyaeundei gou, hawj gvaengh mbanj gou hoenghning dangqmaz.

Ndit set roengz gwnz dah, raemx myab ndongq myab ndongq, lumj baenz gyoengq ndaundeiq youq gwnz dah diuq foux. Geij duz bitiq cwxcaih dwk youz gvaqdaeuj, yaep ndeu baek aen’gyaeuj roengz raemx bae, yaep ndeu daj fwed boebboeb, hawj raemx sinz hwnj fubfub, hapraemx baenz gien baenz gien mbe doxok.

Mwh mbawfaex loenqfoenfoen, dah’iq youh dwg lingh cungj gyaeu ndeu. Mizmbangj mbawfaex loenq roengz gwnz raemx, couh lumj aen dem aen ruziq, riengz raemx fouzyedyed biu baenaj; mizmbangj mbawfaex loenq roengz henz hamq, hawj henz hamq lumj bu fan danj nanwtnwt saekgim nei. Mwhneix dah’iq caemdingh youh unqswnh, hawj vunz yawj le siengj ngon sei.

Mboujlwnh dwg haetromh ndit set gwnz dah ndongqmyanz, roxnaeuz dwg seizcou mbawfaex loenqfoenfoen, diuz dah’iq mbanjranz cungj gag youq de, dinghdingh dwk yawj mbanjranz bienqvaq. De mboujdan ganqciengx benq dieg haenx, hix rapdawz gij ndaejgeiq ndeiraeuh seiz lwgnyez gou.

Gou gyaez dah’iq mbanjranz.