Aen gyajgiz neix, daxmeh oet bonj saw《Sawgeq Yawj Sat（古文观止）》 hawj gou, naeuz neix dwg “gij gienbaengzyoux vunz ciuhgeq”. Gou hozngeiz: Vunz ciuhgeq hix miz gienbaengzyoux? Gou baez biengjhai, ngawhngwd lo, cungj dwg saw ciuhgeq! Hoeng cengqgengz doeg roengzbae, cij fatyienh bonj “gij gienbaengzyoux vunz ciuhgeq” neix caen mizyinx raixcaix!

Boux daih’it okdaeuj dwg Fan Cung- yenh, de dwg boux yousim guekgya yousim lwgminz ndeu, gij gienbaengzyoux de daihgaiq dwg yienghneix: “Ngoenzneix youh bae Yozyangzlouz youzcet lo, yawjyawj gij bya dah gyaeundei neix, gou gietdingh aeu dang boux hak ‘yousim lajmbwn’ ndeu!” Baihlaj miz baenz dong diemjhaenh, bingzlwnh: “Fan vunzhung vifung!” “Yienghneix cij dwg cingq naengzliengh!”

Yienzhaeuh dwg Cuhgoz Lieng, de dwg bouxhak caenhsim caenhrengz ndeu. Gij gienbaengzyoux de dwg yienghneix: “Ngoenzneix youh gyaban daengz gyanghwnz, vihliux aen guek Sujhan, gou caen dwg caenhsim caenhrengz, dai bae cij sat lo!” Baihlaj Liuz Bei bingzlwnh: “Gungjmingz dwgrengz lo!” Liuz Canz hoizfuk: “Daxboh caijsieng aeu goq ndei ndangdaej!”

Ceiq dwgriu dwg gij gienbaengzyoux Suh Siz lo, de dwg boux siujgvij ndeu, gij gienbaengzyoux de haemzbaengzlaengz dwg gij ndeigwn: “Ngoenzneix cauh byaek moq lo——Nohdunghboh, caezgya vaiq daeuj cimzcimz!” “Youq Vangzcouh fatyienh cungj bingj ndeu, ndei gwn raixcaix, gou hawj de anmingz guh “Bingjdunghboh!” Baihlaj Vangz Dingzgenh bingzlwnh: “Lauj Suh, mwngz youh biz haujlai luba?”

Mboujgvaq hawj gou ceiq gamjdoengh dwg gij gienbaengzyoux Lij Miz: “Daxbuz dawz bingh lo, gou yaek swz guen ma ranz ciuqgoq de. Yienznaeuz vuengzdaeq hawj cienzhong hawj gou gig lai, hoeng ‘roegga hauqswnh, dauq ciengx duzmeh’.” Baihlaj diemjhaenh foenfoen: “Lwghauq ho!” “Neix cij dwg daeg lwg ndei ndeu!”

Doq doeg doq doeg, gou fatyienh gij vunz ciuhgeq neix yienznaeuz swnghhoz youq cien bi gaxgonq, hoeng gij angqaeng hujheiq de caeuq raeuz doxlumj riri. Gyoengqde hix vih guhhong nyapnyuk, vih vunz ndaw ranz causim, vih gij ndeigwn guengzbag. Cijdwg gyoengqde dawz gijneix raiz baenz “faenzcieng okmingz”, baez mbouj siujsim couh riuz baenz cien bi.

Seizneix gou hix yaek hag raiz di ngoenzgeiq, gangj mbouj dingh gvaq geij cien bi le, “gij gienbaengzyoux” gou hix ndaej genj haeuj 《 Bonj Moq Sawgeq Yawj Sat》 bae ni! Daengz seizhaenx vunz ciuhlaeng doeg daengz gou raiz coenz vah “ngoenzneix youh raiz mbouj caez cozyez, deng lauxsae naeuz lo”, mbouj rox gyoengqde dwg mbouj dwg riu dwk enj aek enj ai bae?

(bouxraiz: Yij Fungh bouxhoiz: Yinj Fuzgen)