“Soengq vunz meizgveiq, rang lamq ndaw fwngz.” Siengj mbouj daengz, gij roeg laeng ranz naj ranz haenx, gingqyienz mbouj rox mbouj nyinh hawj coenzvah mizmingz neix ndaej miz cungj cawqgej linghgag ndeu.

Youq ndaw singz ningcumcum haenx, ndwenngoenz couh lumj aen gihgi baenq vaiqlulu ndeu, mienx mbouj ndaej hawj vunz simgaenj caeuq nyapnyuk. Hoeng aen bakcueng ranz gou, cix lumj aen dieg caemrik gyaeundei ndeu, baenz gizdieg raeujrub gou umjgot swyenz ndeu. Youq gizneix, moix ngoenz haetromh, geu ndit nduj lijcaengz ciuq lajdeih liux, gij sing roeg heuh couh ciuqseiz yiengj hwnjdaeuj, haenx dwg aen cung gagbaenz gou, hix dwg mwh hainduj gyaeundei ndaw ngoenz gou ceiq maqmuengh haenx.

Hainduj, haeujsim gyoengq roeg haenx dwg aenvih miz di sing yiengj. Ngoenz ndeu haetromh, gou lij yaek ndiu yaek mbouj, dingqnyi rog cueng miz sing dajfwed caeuq gij “singgo” cici cetcet. Gou rox, youh dwg gyoengq “cangh fwen iq” daeuj heuh gou hwnq lo. Gou bomq youq gwnz bakcueng, song da myoxmywd dwk yawj gvaqbae, raen duzroeglaej gyaeulili ndeu ndwn youq bien bakcueng, ngeng gyaeuj, ngveihda ndaemndi’ndi cingq geizheih dwk yawj coh ndaw rug. Gij bwn raizhenj de, youq lajndit ciuq ngaeuzluemj youh unqswnh, aenbak henjoiq baez aj baez haep, lumjnaeuz caeuq gou gangj gijmaz. Gou hai aencueng, duzroeg haenx couh fub mbin bae lo. Gou daek geng haeux ndeu vanq youq gwnz bakcueng, naemj hawj de gwn donq imq ndeu. Gvaq mbouj geij nanz, de daiq gyoengq hujgeiq ndeu mbin gvaqdaeuj. Gou cim coh gyoengqde dot haeux seiz gij siengqyiengh angqyangz haenx, combak gag miz riu okdaeuj.

Daj baezhaenx hwnj, gou moix ngoenz youq bakcueng muenghcaj caeuq roeg doxraen. Hainduj, gou baez miz gijmaz doenghdanh, gyoengqde couh doeksaet dwk dajfwed mbin deuz, nanznanz cij gamj mbin dauq, neix hawj gou roxnyinh miz di doeknaiq. Couh yienghneix gueng gyoengqde ndwen lai, gij roeg douh youq gwnz nyefaex najcueng ciemhciemh lai lo, aen damj gyoengqde hix yied daeuj yied hung lo. Seizneix gou ndingq haeux, gyoengqde gaenq mbouj doeksaet mbin deuz. Hawj gyoengqde saenq gou caen mbouj yungzheih, gou nyaenx mbouj ndaej youq najcueng mbouj dingz gaep siengq, dawz gij seizgan dinjdet gou caeuq roeg guhdoih neix ingj roengzdaeuj.

(Cangh Cinghyenz raiz Luz Yau hoiz)