Ndaw suenva miz duz saehaexma iq ndeu, de moix ngoenz cungj yawjraen gij va henz ndang de youq laj ndit haihoengh, mbungqmbaj youq gwnz cazva diuq foux yegyeg, hozhaenz dangqmaz.

Saehaexma iq miz aen loqsiengj hung ndeu, couhdwg benz hwnj byai gofaex ceiq sang ndaw suenva, bae yawj gij gingjsaek gizgyae. Baengzyoux de cungj riu de, naeuz de dwg siengj hawj mbwn hai, duz saehaexma iq ndeu baenzlawz bin ndaej hwnj gwnz gofaex baenz sang bae.

Hoeng saehaexma iq mbouj doeknaiq, de moix ngoenz cungj benz doxhwnj mbouj soengset saekdi. Gyangngoenz, de dak ndithaenq; gyanghwnz, de nyaenxsouh nitgyaengj. De benz gig menh gig menh, hoeng yamqdin de cix mbouj daengx gvaq.

Doeklaeng, gvaq le haujlai nanz, saehaexma iq caen benz daengz byai faex lo. De yawjraen gij gingjsaek gyaeundei caengz raen gvaq haenx, bya gizgyae goengq daeb goengq, ndaw dah raemx laecancan, sojmiz gijneix cungj hawj de vuenheij dangqmaz.

(Laujyangz hoiz)