Vunzlai cungj heuh diuz gai de guh gaigeq.

Gaigeq dauqdaej miz geijlai geq gou mbouj rox, hoeng gou cix rox: Gwnz gaigeq ngoenzngoenz cungj nauhyied baenzmaz bae.

Banhaet, gyoengqvunz daj ndaw fangzhwnz ndiu hwnjdaeuj, seizneix diuz gaigeq hix daj ndaw fangzhwnz ndiu lo, gij diemqbouq song mbiengj gai youh hainduj haidou guh seng’eiq lo, bouxbuenq hix hainduj hemqheuh lo. Geij goenglaux naengh youq bakdou ranz gangjgoj, gyoengq lan heux gyoengqde buet bae buet dauq; youq baihnaj bouqgaibau, bouxgaibau biengj fa aen caengq, raq heiq ndatfwdfwd ndeu suek dwk heiq mienh heiq noh rangfwtfwt haenx coemj haeuj ndaeng daeuj, hawj vunz myaiz rih liux；henz dan gai byaek, miz geij boux vunzlaux cingqcaih genj gij byaek lij nem raemxraiz haenx. Ndaw diemqfaenj, geij boux hauxseng hwnq caeux haenx, cingq gwn faenj feih dangqmaz.

Daengz banringz, gyoengq lwgnyez sam haj bang comz youq luengq hongh guhcaemz diuqranz; youq laj raemhfaex, geij boux vunzlaux humx naengh youq henz daizrin dwkgeiz; gwnz dieg hoengq baihhenz, gyoengq mehmbwk diuq fouxgvangjcangz; rumz saeq ci daeuj, nyouq ndaej heiq hom haeuxbyaek daj geij ranz vunz biu okdaeuj…… Banringz it diemj lai cung, gyoengqvunz cungj bae yietnaiq lo, diuz gaigeq bienq ndaej caemrwgrwg, byaij youq gwnz gai, lij you yamqdin bonjfaenh gyuk diuz gaigeq.

Doengxhaemh gaigeq youh nauhyied hwnjdaeuj! Mbouj rox daj gizlawz daeuj baenzlai vunz, yaep ndeu caenx rim gwnz gai. Bouxcoz ndaw ngoenz mwh ceiq cwxcaih hab’eiq de couh dwg bae youz gaigeq lo, caih heiq dangz cauj maklaeq、cauj ngveihgve ndonj haeuj ndaw ndaeng bonjfaenh bae…… Ngoenznaengz youq seizneix, gyoengq lwgnyez cungj aeu humx youq laj gofaex bae caj vunz gangjgoj. Hoeng ngoenzneix cix mbouj doengz, gyoengqvunz youq laj gofaex gaq daiz yienj heiqngaeuz, gyoengq lwgnyez humx ndaej ndaw sam caengz rog sam caengz, da daengx luenzlulu. Yienjheiq daengz giz ndeiyawj, gyoengqvunz cungj hemq hwnjdaeuj.

Youq ndaw sing’angq singriu neix, gaigeq ngoenz ndeu youh gvaqbae lo, gyoengqvunz cungj nyaengq hagsib nyaengq guhhong, lumjnaeuz lumz liux gij heiq oenqfeiz ndawbiengz. Danghnaeuz mwngz siengj hawj ndaw sim nyapnyuk dinghcaem roengzdaeuj, couh daeuj gwnz diuz gaigeq neix byaijbyaij ba. Cijmiz heiq oenqfeiz ndawbiengz, cijndaej nainod caeuq raeujrub aen sim vunz.

( Loz Cinzyui raiz / Veiz Yennaz hoiz)