“Lwg ha, hwnqcongz lo!” Gou lij guh fangzhwnz couh ndaejnyi daxmeh unqswnh heuh gou singj.

Gou nunu da, naengh hwnjdaeuj, couh dingqnyi daxmeh riu naeuz:“Yawjyawj byoemgyaeuj mwngz, nyungqnyat lumj rongzgaeq lo! Ngoenzneix, mwngz gag cug byoem ba!”

Gou roxnyinh mbouj onj: Gou lijcaengz gag cug byoem gvaq, cug ndaej ndei lwi? Gou byaij daengz naj gingq, diem amq heiq laeg ndeu, gaem fagroi, hainduj “bienqndang hengzdoengh” ngoenzneix lo.

Bouh daih’it, roi hawj byoem swnh. Gou aeu fagroi roi gyaeuj, aiya, mbouj ndei lo, byoem gou bwz ndaet lai, fagroi gaz youq gwnz gyaeuj! Gou yungh rengz rag, gaenj byoem rag naenggyaeuj, in lai lo, gou heuhgvakgvak. Yienghneix roi mbouj baenz, baenzlawz guh ne? Gou sawqmwh siengj daengz: Aeu fwngz roi ha! Baenzneix, gou cuengq fagroi, fwngz ndeu naenx goek byoem, fwngz ndeu siujsim riri gaenj dem gaenj gej byoem nyungq. Gej byoem sat, gou gaenq hanh dumh ndang liux lo.

Bouh daihngeih couh dwg cug byoem lo. Bingzseiz, daxmeh maij cug song diuz mengq hawj gou, ngoenzneix dwg gou baeznduj cug byoem, gaej guh nanz lai——Cij cug diuz mengq sang ndeu ndaej lo. Gou aeu fagroi roi byoem roi baenz bog. Ngamq hainduj gou nyinhnaeuz bouh neix gig genjdanh, bae guh cix roxndeq mbouj yungzheih. Gou aeu fagroi roi byoem coh laeng gyaeuj, hoeng byoemgyaeuj doeng doek fwt ndeu, sae doek fwt ndeu, couh dwg roi mbouj baenz bog caezcingj ndeu. “Mwngz aeu song fwngz boiqhab, fwngz ndeu gaem byoem, fwngz ndeu roi byoem daengz laeng gyaeuj. Sawq lai baez couh rox lo.” Daxmeh daj ndaw rug byaij okdaeuj, son gou. Gou sawq le geij baez cij ra ndaej fuengfap, cug baenz diuz mengqriengmax sang ndeu lo.

Youq ndaw gingq, diuz mengqriengmax gou yienznaeuz mbouj suenq ndeiyawj, hoeng dwg gou roengzrengz cij guhbaenz, gou sim’angq riunyumnyum. Gizsaed cijaeu daihdamj bae sawq, gijmaz saeh cungj menhmenh hag rox!

(Sunh Gingjloz raiz Lij Yanghlenz hoiz)