Ndwenloeg, makgai gwnz go couh yaek henj lo, nditndat ciuq ndaej vunz hanh lae hanh roenx. Mboujdan dwg bouxvunz, doenghduz hix ndat ndaej iet diuzlinx okdaeuj raeznangnang diemcaw fofo. Hoeng hix miz duz manz damyouz haenx mbouj lauxsaed, buet ok baihrog daeuj guh gveijgvaiq. Mwngz yawj, mwhneix couh miz duz meuzndaem ndeu cingq boemz youq gwnzdingj aenci laj go makgai. Lwgda de youh rongh youh luenz, baenqlulu lumj rox cuengqdienh nei bouxlawz yawjraen sim cungj saenzdedded, duznou mbat ndum raen geu heiq de cungj buet ndaej hoenz mbin caez.

Duzmeuzndaem miz aen mingzcoh cingqging goksad he, heuhguh , aenvih duzmeuzndaem dingqvah, bouxcawj sim’angq, couh an diuz coh neix hawj de.

Lwgndaem yienznaeuz ngamq ndaej hopbi, hoeng de lij iq couh gaenx riengz meh hag bonjsaeh, banngoenz youq ranznden ninz, banhaemh couh gizgiz cunzyawj miz mbouj miz nou okdaeuj guh luenh. Lwgndaem ndangcangq lingzvued, bouxlaux son de de yunghsim hag, youh gwn ndaej hoj, youq aen deihbuenz haenx, de gaebdawz duznou ceiq lai, laehgoeng ceiq laux. Couh dwg yienghneix, Lwgndaem youq mbanj de okmingz lo, ndaw mbanj bouxboux cungj haenh de, gyoengq meuzcoz duzduz cungj hag de, cawzliux duzmeuzhau.

“Huk ndaem, mwngz youq gwnz ci guhmaz? Yaek caj gwn makgai guh caeuz mbouj gwn nyeq ha? Gij sing riugikgik duzmeuzhau youq ndaw ranz biu okdaeuj. Lwgndaem huj dwk:“Hwng! Yahgik mwngz gwn imq couh ninz rox gijmaz? Gou benz sang cij muengh ndaej gyae, yawj ndaej gvangq, hen ranz ngaih. Gou dai hix mbouj hag mwngz giklanglang hawj vunz riu ne.”Duzmeuzhau raen Lwgndaem mbouj dawz de haeuj da, ndawsim mbouj fug, cungj siengj ra gihvei loengh Lwgndaem baez ndeu.

Miz ngoenz ndeu, duzmeuzhau bin hwnj aen congzsaw bouxcawj, daegdaengq bungq hawj aencenj doek roengz gwnz namh soiq bae, Bouxcawj mbat raen aencenj ceiq dijbauj de deng soiq lo, hujdengdeng:“Dwg duz lawz guh vaihsaeh? Vaiq di okdaeuj nyinh loek!” Duzmeuzhau aen bak gvai gvaq vunz:“Mbouj dwg gou, mbouj dwg gou, dwg……” Duzmeuzhau hemqmiumiu, makda baenqlili cim coh Lwgndaem.“Gou rox dwg mwngz. Mwngz ngoenz daengz haemh benz sang benz daemq, cungj manz gvaq vunz. Ngoenzneix gou aeu sousib mwngz, mboujne baezlaeng mwngz lij famh.”Bouxcawj gangj sat couh dawz diuz nye iq ndeu yaek fad Lwgndaem. Lwgndaem soqlaiz mbouj raen bouxcawj fatheiq baenzneix laux, de hix mwnh lo, mbouj caj de ndiu gvaqdaeuj, couh ngaiz bouxcawj fad deng ga sieng lo, de in dwk daejiekiek, sikhaek ndoj haeuj giz gungx bae, cij gip ndaej diuz mingh he dauq. Lwgndaem siengsim dangqmaz, haemz dai duzmeuzhau, hix mbouj siengj ma ranz lo.

Laxlawz, duzmeuzhau mbouj dwg beixnuengx Lwgndaem, dwg bouxcawj bae haw cawx dauq ranz. Duzmeuzhau bwn seuqsetset, makda luenzlulu, bouxcawj gyaezgyoh de dangqmaz, cawx bya cawx nohgaeq hawj de gag gwn, ngoenznaengz got youq ndaw rungj cungh de. Duzmeuzhau ngoenz daengz haemh nou mbouj gaeb, ndang mbouj yungh swiq, haex nyouh hix hawj bouxcawj bang beuj, gwn ndei youq ndwi, giklanglang ninz dwk dak ndit gvaq ngoenz.

Lwgndaem simsoh, mwh duzmeuzhau daeuj nduj, de laihnaeuz miz hujgeiq ndei daeuj caeuq de guhdoih, couh angqfofo buet daeuj dongx duzmeuzhau, yaek riengz duzmeuzhau guhcaemz. Bouxlawz rox duzmeuzhau dasang, raen Lwgndaem byaij daengz henzndang de, gij bwn daengx ndang de cungj daengj soh, aen bak coh Lwgndaem maenjhumhum, hwk dwk Lwgndaem mwnhsaengsaeng. Lwgndaem ngeix mbouj doeng duzmeuzhau vihmaz caengz de, nyapsaebsaeb ma ranz cam meh:“Meh, meuzhau ngoenz daengz haemh youzlangh, mbouj rox laex, nou hix mbouj gaeb, daekeiq dangqmaz, vihmaz bouxcawj cix maij de lai gvaq gou? ”

Meh Lwgndaem han:“Lwg ha, raeuz dwg meuzdoj, bouxcawj ciengx raeuz couh dwg hawj raeuz bang de hen ranz gaeb nou, mbouj cix raeuz couh bienqbaenz duzmeuz deq vunz hawj cij ndaej ciengx bak lo. Duzmeuzhau dwg meuzhek, vunz ciengx daeuj gaijmbwq guh’angq, ngoenzlawz mbouj miz vunz ngah’aeu de le, de couh dai iek lo .” Lwgndaem dingq le goemq rwz ngauz gyaeuj:“Mbouj dingq, gou mbouj saenq, mwngz yaeuh gou. Duzmeuzhau couh dwg yiemz gou gaeb nou ndang uq, mboujnyienh guh youx gou. Daj ngoenzneix hwnj, gou hix mbouj bae gaeb nou lo, youq ranz caj gwn youzlangh.” Lwgndaem fatheiq buet deuz lo. Meh Lwgndaem dingq le yousim dangqmaz.

Lwgndaem gangj daengz guh daengz, ngoenznaengz roi hawj gij bwn de youh seuq youh ndongq, hix mbouj caiq bae gaeb nou lo, ciengzciengz bae ra duzmeuzhau guhcaemz. Duz- meuzhau mbouj miz baengzyoux, Lwgndaem daeuj ciengq fwen hawj de dingq, gangjgoj hawj de nyi, de menhmenh hix maij Lwgndaem lo, ngoenzngoenz caemhdoih haeujhaeuj okok, cibfaen vuenheij.

(caengz sat)

Lwgndaem