Ngaeux, dwg gij doxgaiq gwnz daiz gwnhaeux ranghdieg Gyanghnanz miz dah miz daemz lai haenx ciengz miz, dwg gaiqgwn gyoengqvunz ngoenz- naengz ceiq yawj mbouj hwnj da hoeng youh mbouj ndaej mbouj miz he. De seng youq geh raemx, maj youq geh namh, ndawde ndumjhamz gyaeundei caeuq cinghseuq. Cingq lumj gij vunz caeuq saeh laj bit Vangh Cwnghgiz sienseng simsoh youh laeggyae haenx, cungj ndaej mbouj rox mbouj nyinh rad deng sim vunz.

Seizhah aeng, mbaw ngaeux ndaw daemz mbaw ciep mbaw, beiq daengx daemz rim liux，baijok fuk gingjsiengq heuswd mwnhoengh. Gij mbaw ngaeux miz hung miz iq, miz mbaw mbe caez, miz mbaw miz di gienj suk, lumjbaenz daswyenz boux canghdajveh hungmbwk neix seizbienh roengz bit veh veh, youq gwnz raemx veh ok fuk doz hoenghhwd youh gyaeundei ndeu nei. Hoeng youq baihlaj heuswd mwnhoengh neix, couh dwg gij ngaeux ndoj youq ndaw naezboengz, caegcaeg sengmaj, rom rengz maj oem, caj seizcou aen geiqciet fungsou neix daeuj ra de.

Vat ngaeux, dwg hangh hong gisuz ndeu, hix dwg hangh hong naek ndeu. Seiziq, daxboh daenj geu vaq fuengzraemx, byaij roengz daemz bae, dawz fag hongdawz vat ngaeux gagguh haenx youq ndaw naezboengz siujsim sisi bumhra, moix vat ok diuz ngaeux, cungj lumj vat ndaej gaiq dijbauj ndeu. Gij ngaeux hausak, daiq miz gij heiqsik moq namhnaez, dwg gaiq doxgaiq ceiq caen mbwn namh soengq hawj dou.

Ngaeux, ndaej ronq baenz gaiq rob le dwk diuzliuh gyaux baenz byaekliengz, ndaej ronq baenz gaiq cauj, lij ndaej aeuq dang, moix yiengh guhfap cungj ndaej baijok gij feihdauh daegbied de. Hoeng youq ndaw sim gou, gij ceiq ndei de, mbouj gvaq dwg duix mwnhngaeux genjgenj danhdanh he. Dawz ngaeux moq swiq seuq, muh baenz ieng, caiq aeu samuengx daih hawj raemx ieng caem daej, doeklaeng ndaej gij mwnhngaeux saeqnaeh hau lumj nae haenx. Mwh yaek gwn, cij aeu aenq raemxgoenj cung roengzbae, menhmenh ndau, duix mwnhngaeux ndongqngaeuz gyaqciq、heiqhom caengq ndaeng ndeu couh baij youq laj da.

Gwn mwnhngaeux ceiq ndei youq haetromh gwn. Mwh geu ndit daih’it ndonj gvaq mok mbang, ciuq youq gwnz daiz, duix mwnhngaeux ndatfoedfoed ndeu, dapboiq aen gyaeq habbau ngamq cien baenz, couh dwg gij haidaeuz ceiq raeuj ceiq hom ngoenzde. Gij mwnhngaeux haenx, raeuzrad mbouj nywnx, van unq mbouj get, haeuj bak cix yungz, couh lumj yaepyet ndaej yoek hawj gij bak ngah gwn ninzndaek daengx hwnz haenx ndiu dauq, hawj vunz cingsaenz gvaekgvaek.

Duix mwnhngaeux neix, dwg faenh fuk iq ndaw ndwenngoenz ndeu, de mboujdanh dwg gaiq gwn he, engq dwg cungj geiqdak cingzgamj ndeu, cungj ndiep diegcoj ndeu, cungj ngeixdauq seiz lwgnyez ndeu. It baez ndaej cimz gij feihdauh sug neix, sim gou mbouj youz gag mbin dauq diegcoj raeujrub caeuq ce rim ngeixdauq haenx. Gizhaenx miz coenz daengq bohmeh, miz angq riu seiz lwgnyez, miz ndwenngoenz gig genjdanh hoeng gyaeundei. It baez rumzcou hwnj, gou couh roxnyinh youh daengz seizciet vat ngaeux lo, faenh raeuj ndaw ranz hawj gou haenx caiq youq ndaw sim gou baenqvaenz.

(Cau Yencwz raiz Veiz Yen’gyangz hoiz)