Seizcin dwg lai saek lai yiengh, daengngoenz hoengzfwgfwg, mbwn seuq- liklik, mbawfaex loegyeuyeu, vacin henj- rwkrwk…… Nanzgvaiq boux canghsei maij raiz seizcin, boux canghveh maij veh seizcin, aenvih seizcin gyonj gij gyaeu youq itheij, gyonj gij saek youq itheij. Gijneix mbouj ndaej mbouj hawj vunz ngeixngvanh daengz, gij lai saek lai yiengh neix vihmaz leh youq seizcin mbat dog daeuj daengz gwnzbiengz.

Seizcin fwn doek moenqfifi, hawj namh nyinh caez, rwed sojmiz doengh- yiengh liux, youq mwh gyoengqvunz mbouj rox mbouj nyinh, de caegcaeg lae baenz diuz dah iq ndeu, rom baenz daemz raemx laeg ndeu. A! Laxlawz dwg seizcin doek fwn cix hawj ndaw daemz bienqbaenz loegyeuyeu.

Rumz caeuq fwn cungj dwg guhdoih daeuj daengz. Haicin rumz miz di nit, boqsingj sojmiz doenghyiengh, byaifaex loeg lo, gwnzbiengz loeg lo, gwnz binghdaiz aen laeuz sangngaungau hix loeg lo. Sungcauz Vangz Anhsiz miz sei naeuz:“Rumzcin youh loeg hamq Gyanghnanz.” Naeuz ndaej gig ndei ha! Hoeng cij dwg “loeg” ma?

Youq ndaw rumzcin ci daengz, va hai rim bo rim baq, duj ndeu song duj, caz ndeu song caz……Lienz baenz benq, lienz baenz haij. Gyoengqvunz yawj saeklamz saeknding saekhenj ……Gij saek lai saek daih heiqseiq hungmbwk neix, ndaw sim mbouj miz nyapnyuk lo, mbouj miz doeknaiq lo. Gyo’mbaiq gij saek seizcin, daiq hawj vunz gij ligliengh doxhwnj caeuq saenqsim.

Hoeng, danghnaeuz mwngz gungj- ndang bae saeqsim yawjngonz, mwngz couh fatyienh gij saek ndeiyawj de, lijmiz di reuqhenj, de dwg gij rizhaenz mwh ndwenlab ce roengzdaeuj, lauheiq mwngz rox danqheiq:“Caen dwg ndei mbouj liux caez ha!” Yawj bae gij nya reuqhenj de, bouxlawz rox, yienzlaiz gij nya baihrog reuqhenj haenx baihndaw de dwg loeg lo! Gijde hix dwg hawj seizcin dem saek ne.

Gou dauqdaej rox daengz gij saek seizcin vihmaz baenzneix gyaeundei, dwg dahsau seizcin dawz gaiq bitcaij gyang fwngz de veh okdaeuj, dwg gwnz ndang lwgnyez daenj geu buh gyaeundei, dwg vunzlai yawj mbouj raen gij go’nya menhmenh did loeg haenx.

Gij vunz caenhcingz bae yiengjsouh gij saek seizcin haenx, mwngz youh guh ndaej gijmaz hawj saek seizcin？

(Cwnz Yungzsez raiz Veiz Haijgen hoiz )