Youq ndaw ukgyaeuj gou, gij siengqyiengh ranz gaeuq diegcoj cungj geiqndaej cingcing cujcuj. Gwnz dingj ranz gaeuq hoemq vax heu- mong, gij riz ndwenngoenz youq gwnz vax raih baenz diuz baenz diuz raizrwd. Ciengz dwg aeu namh cuk baenz, ndit ciuq hwnj ciengz bae, sanq gij heiq namh okdaeuj. Gyanghongh mbouj hung, aeu rinndaek bu gwnz namh, congh geh rin mizseiz did geij go rum okdaeuj. Gungx gyanghongh, baijcuengq mbangj hongdawz gaeuq, lumj naeuz mbouj ok sing couh ndaej lwnh gij goj ngoenz guhhong gaxgonq de.

Aen rongz roegenq lajroq ranz gaeuq, dwg gingjsaek ceiq lingzdoengh aen dieg gizneix. Aen rongz roegenq haenx lumj aen singzbauj iq gyaeugetget nei, aeu namh caeuq rumsauj saeqsim guhbaenz. Moix daengz seizcin, gyoengq roegenq couh mbin dauq lo, gyoengqde youq henz rongz mbin bae mbin dauq, angq dwk heuh “cici cetcet”, ranz gaeuq couh nauhyied lo.

Gou ciengzseiz loq dauq diegcoj, youq haetromh, ranz ngamqngamq rongh, ndit raeujremrem saj youq gyang- hongh ranz gaeuq. Gyoengq roegenq senq nyaengq lo, gij ngaeuz gyoengqde vaiqvit mbin gvaq roqranz. Daxbuz naengh youq gwnz aen daengq iq gyanghongh, henz ndang cuengq lamz byaekheu ndeu. Daxbuz aeu faj fwngz nyaeuq de genj byaek, mizseiz ngiengx gyaeuj yawj coh rongz roegenq lajroq, ndaw da cungj dwg ndiepgyaez. Dahnuengx ranzhenz couh naengh youq henz daxbuz, cingq dawz diuz faex iq ndeu youq gwnz namh veh gvaengh, raen gou le, lwgda couh rongh lo, angq hemq:“Dahcej, mwngz daeuj la!”Daxbuz dingqnyi sing’yaem, veq gyaeuj gvaq- daeuj, riunyumnyum iet fwngz coh gou, heuh naeuz:“Lan gvai, daeuj henz buz vaiqdi!”

Gij ndit lajbyonghngoenz gikgyadgyad dwk set roengz- daeuj, ndonj gvaq gij mbaw govaiz gyanghongh haenx, seq baenz benq baenz benq raiz rongh youq gwnz namh. Daxbuz naengh youq lajroq, dawz aen gingq dava, liuqda yunghsim dwk nyib buh fong vaq. Cimmae youq gwnz baengz con cae rag dauq, couh lumj gij gvansim de ityiengh, youh saeq youh raez. Gou caeuq dahnuengx ranznden ngiengx gyaeuj dwk, lwgda cimyawj rongz roegenq, hoznaet hoznanq hix mbouj goq. Gou mboujseiz diuq hwnjdaeuj, yaek siengj yawj cingcuj di, ndaw bak lij angq dwk caeuq dahnuengx daujlun naeuz:“Mwngz yawj, gij bwn duz roegenq lwg lumjnaeuz youh bienq rongh gvaq ni!”Dahnuengx roengzrengz ngaek- ngaek gyaeuj, han naeuz:“Dwg ha, gyoengqde haengjdingh gig vaiq couh ndaej majhung lo.”Daxbuz dingz gij hong gyangfwngz, song da unqswnh dwk gaen bae riengz dou, gok bak miz geij sai riu, singdaemq daengq dou:“Gaej ning lai, roegenq lwg deng doeksaet bw.”

Saedceij baenz ngoenz baenz ngoenz gvaqbae, gyoengq roegenq lwg youq ndaw maqmuengh de ciemhciemh majhung. Gou ndwn youq gyanghongh, geizheih dwk cam daxbuz:“Roegenq seizlawz rox mbin bae ha?”Daxbuz ngiengx gyaeuj hwnjdaeuj, yawjyawj rongz roegenq menhmenh naeuz:“Caj gyoengqde caiq majhung di dem, hag rox mbin lo, couh rox bae ra aen mbwn gyoengqde lo.”Hoeng gou caen nyaenx mbouj ndaej gij ngeizvaeg ndawsim, couh buen aen daengq iq ndeu daeuj, gig siujsim dwk ndwn hwnjbae, siengj depgaenh yawj ndaw rongz roegenq baenzlawz yiengh. Gou yaemj din yaemj fwngz nod bae naj, lwgda cim aen rongz roegenq, ndawsim youh gaenj youh angq.

Gig vaiq, di mauhyiemj gou couh deng daxbuz raen lo. De mizdi youheiq dwk vaiqvit byaij daeuj, yaeng’yaeng fuz gou roengzdaeuj, yienzhaeuh rubrub aen gyaeuj gou naeuz:“Lwg gveijgvaet mwngz, ndawsim cungj yienghneix geizheih lai.”Gou ietiet linx, ing youq ndaw rungj daxbuz. Daxbuz riu dwk got gou, ndaw lwgda cangrim ndiepgyaez.

Seizgan lae bae lumj raemxdah, ranz gaeuq deng rumz ci fwn rwed ciemhciemh loemqlak, rongz roegenq hix youq ndaw ndwenngoenz baedauq mbouj caiq baenzyawj lumj seizgonq, daxbuz hix ciengxlwenx biek gou bae lo. Hoeng gij seizgan dinjdet seizgonq ceiq bengz haenx, couh lumj gij ndit raeuj ndawsim, gyoengqde son gou rox insik caencingz, yawjnaek sengmingh, hawj gou youq gwnz roen ciuhvunz, dajdingh bungz daengz fwnrumz, hix ndaej gotdawz faenh raeuj neix, bae ra gij rongh maqmuengh. Hawj faenh gyaez caeuq raeuj neix youq ndaw dah ndwenngoenz lae baenaj yinznaunau, baenz gij rengzgoek caeuq dazyinx cingsaenz ciengxlwenx mbouj rox lumz ndaw sengmingh gou.

(Danz Gyahnoz raiz

Vangz Vazdingz hoiz)