Mwh geu ndit romh nduj unqnemnem rub gvaq daihdeih, doenghgo cungj lumj daj ndaw rungj raeujrub neix ndiu dauq. Gou doq yamq din mbaeumbeng doq ciengq go dwk, angqvauvau byaij youq gwnz roen bae hagdangz, ndawsim cangrim gij maqmuengh seizcin lai saek.

Gij funggingj gwnz roen lumj gienj veh nei mbehai, nditrongh set gvaq mbawfaex, sajroengz gij ngaeuzndit ronghmyabmyab, baenz benq baenz benq rum iq henjoiq caegcaeg daj ndawnamh con gyaeuj okdaeuj, lumjdwg bwnyungz ceiq saeqnaeh daswyenz, vih daihdeih bu le caengz deihdamj unqnemnem ndeu. Gyoengq va hix mbouj gamsim doeklaeng, doxceng haihoengh, gij hoengz lumj feiz, gij maeq lumj fwj, gij hau lumj nae, gyoengqde youq ndaw rumz saeq ngauznged bi ndang, sanqfat ok baenz raq baenz raq heiqhom, sawj vunz simmaez.

Diuz roen ndawmbanj senggei riri neix, ceiq sawj gou nanzlumz couhdwg gij singriu sing’angq gyoengq doengzhag. Caezgya roxnaeuz song boux guh bang, roxnaeuz sam boux guh doih, najriu najhai, damzlwnh saeh mizyinx ndaw gyajgeiz, faenyiengj gij maqmuengh haggeiz moq. Gij singriu neix, ndeidingq dangqmaz, lumj raemxmboq seizcin, swiqseuq gij faenx ndawsim, hawj simcingz gyoengqvunz mbouj rox mbouj nyinh bienq ndaej sangj raixcaix.

Dingq gij singriu gyoengqde, gou nyaenx mbouj ndaej doenghsim dangqmaz. Seizcin, mboujdan dwg aen geiqciet doenghgo dauqndiu ndeu, engq dwg aen geiqciet cangrim maqmuengh caeuq vuedlig ndeu. De daezsingj gyoengqraeuz, mboujlwnh ndwenngoenz baenzlawz nyaengq, aensim cungj aeu baujciz nienzoiq haengjguh、haenqrengz baenaj, bae fatyienh gij gyaeu ndaw ndwenngoenz, bae yiengjsouh gij seizgan angqyangz caeuq baengzyoux youq itheij haenx. Gij singriu neix, couh lumj nditrongh seizcin, raeujrub youh ronghsag ciuq gij roen baenaj gyoengqraeuz, hawj raeuz hagsib seiz mbouj caiq gudog.

Byaij haeuj hagdangz, gou roxnyinh ciuqgaeuq soengset caeuq sim’angq. Aenvih, seizcin lai saek mboujdan dwg daswyenz soengqhawj, engq dwg gij goekraemx seuqcingh caeuq angqyangz ndawsim gyoengqraeuz. Lauxsae son raeuz aeu insik moix baez caeuq vunz henzndang doxcomz, aeu haeujsim bae gamjsouh moix faenh gyaeundei ndaw saedceij.

Youq ndaw seizcin lai saek neix, gou hag rox haeujsim dingq, hag rox le boizaen, engq hag rox le insik. Nyienh gij ndaejgeiq seizcin neix, lumj naed ceh nei, laeglemx ndaem youq ndawsim gou, youq gij ndwenngoenz daengzcog maj rag did ngaz hai gij va engq ronghsien. (Goh Fungh raiz

Nungz Cinfung hoiz)