Mwh daengngoenz lij ndoj youq laj deihbingzsienq, miz ndik raemx iq ndongq ndeu gaenq youq gwnz limqva diuq foux lo. Gij rumz haetromh bongj gvaq, ndik raemx iq din baez conj, ringxlulu conj ok limqva bae. Couh yienghneix, ndik raemx iq yamq hwnj duenh roen geizheih ndeu.

Ndik raemx iq cizdanz byaij baenaj, bungz daengz diuz rij iq laecancan ndeu. Diuz rij iq angqvauvau ciengq go, sing go haenx sepsak ndeidingq, hawj vunz ndaw sim soeng’angq. Rij iq hix yawjraen ndik raemx iq, simndwet dwk iucingj de:“Ndik raemx iq, vaiq daeuj ndaw rungj gou guhcaemz ba, gizneix miz haujlai bya gungq iq!”Ndik raemx iq ngauz gyaeuj laglag, naeuz:“Docih mwngz iucingj, gou siengj bae seiqgyaiq engq hung yawjyawj.”

Ndik raemx iq laebdaeb byaij baenaj, yawjraen dah hung bonghfafa, raemxdah nyoengxfoedfoed, haenq dangqmaz. Yawjraen ndik raemx iq, raemxdah gienj hwnj caengz dem caengz raemxlangh, iucingj naeuz:“Ndik raemx iq, vaiq daeuj ndaw rungj gou, caeuq gou itheij cungdongj rinndumj, deugaek daihdeih ba!”Ndik raemx iq naemj yaep ndeu le, naeuz:“Docih mwngz iucingj, gou siengj bae dieg engq gyae, damqra aen seiqgyaiq geizmiuq. ”

Saedceij ngoenz bae ngoenz, ndik raemx iq daeuj daengz ndoengfaex, yawjraen le gij faexhung mwncupcup, youh nyouq daengz gij va rang raixcaix haenx; youq gwnz diegnywj gvangqlangh, caeuq yiengzbang gangjgoj, caeuq max iq doxdax buet; youq ndaw diegsa gvangqlangh, mbeilaux dwk youq gyang goengq ndoisa con bae con dauq, yawjraen le golinxvaiz deng rengx mbouj dai, da raen le duzlozdoz youq ndaw rumzsa byaij onjwdwd……

Ngoenzneix banringz, ndik raemx iq roxnyinh daengx ndang cungj unq raixcaix, couh laep da dwk, siengj yietnaiq yaep ndeu. Caiqbaez hai lwgda seiz, ndik raemx iq gaenq mbin daengz gwnz mbwn lo.

“Gou baenzlawz daeuj daengz gyangmbwn la?”Ndik raemx iq yawj gij fwjhau henz ndang, ngeizvaeg dwk naeuz. Seizneix, duj fwjhau ndeu menhmenh mbin gyawj de, unqswnh dwk naeuz:“Ndik raemx iq , angqcoux mwngz gyahaeuj aen doih fwj youzlangh!”Ndik raemx iq angq dwk ngaem gyaeuj, raen daengz gij ndoengfaex laj din lumj gij rinbaujheu sanq doek youq gwnz daihdeih, diegnywj lumj gij couzduenh fubfeb, diegsa cix dwg aen haij saekgim.

Dwg lo, cijaeu daihdamj bae roemx, couh ndaej yawjraen gij gingjsaek gyaeundei engq lai.

(Miu Ginhbeiz raiz

Loeg Haijdaek hoiz)