Youq ndaw ukgyaeuj seiz lwgnyez ronghbyanbyan gou, miz geu raeujrub ndeu, couh dwg gij gyaez mbouj ityiengh yahdaiq hawj gou haenx, daegbied dwg gouh haizfaiq de caen fwngz guh hawj gou haenx.

Yahdaiq dwg mehmbwk lajmbanj, ndwenngoenz gaenq youq gwnz naj de deu gij riznyaeuq laeglaeg bae, hoeng fajfwngz lingzvued de, lumj mbouj deng ndwenngoenz muz gvaq ityiengh, cungj ndaej san ok haujlai gojgaeq raeujrub. Roxnyinh daengz gaxgonq, moix baez yaek daengz seizdoeng, yahdaiq couh gig nyaengq, vih daengx ranz vunz bwh gij laex ceiq raeujsim bide—haizfaiq.

Baezde gou gig cingcuj, yahdaiq senj gij maefaiq unqnem caeuq gij baengz na he, hainduj guh aen “hong hung” de. De sien gig saeqsim dwk daeuj rau fajdin gou, caiq youq gwnz gaiq baengz yaeng’yaeng veh vunq, ciep daeuj haiheij meg haiz siuq va ding haiz, gij dinfwngz neix yawjraen yungzheih， hoeng aeu miz naihsim cij ndaej. Yahdaiq daep gingqda, gij mae cim ndaw fwngz de youq lajdaeng fan bae fonj dauq, lumj dwg san aen loq unqswnh nei. Gou naengh youq henzndang de, yawj fag cim daz diuz mae hwnjhwnj roengzroengz, ndawsim gamj- doengh dwk mbouj rox yienghlawz gangj bae. Gou seizde, yienznaeuz mbouj rox gijmaz heuhguh sinhoj, hoeng gou caensim gamjsouh daengz, moix mbat cim moix mbat mae, cungj hamz rim gij gyaez yahdaiq.

Doeklaeng, youq baez gyanghaet seizdoeng ndeu, yahdaiq laeglemx daeuj roq dourug gou:“Lan gvai ha, mwngz yawj yahdaiq dawz gijmaz daeuj hawj mwngz lo?” Gou byaengq lwgda, yawjraen gouh haizfaiq gou ngahngwdngwd haujlai nanz haenx. Gouh haiz neix mboujdanh ndaej hawj gou caenh deuz nit rumz, engq lumj umj gou yienghneix hawj gou raeujrub. Daenj haiz hwnj din, fajdin lumj deng fwj duk ityiengh unqneuneu, moix yamqdin cungj dwg byaij ok vuenyungz cwxcaih.

Moix baez rumznit ci daengz, gou cungj naemj daengz gij riu caeuq fajfwngz nyaengqdidi yahdaiq, gij gyaez de lumj dujfaiq ndaw haiz ityiengh, unqnepnep、raeujremrem, dienz rim mwh lwgnyez seizdoeng gou.

Gij gyaez yahdaiq, couh lumj gouh haizfaiq nei, genjdanh youh naekna, bingzciengz youh hungmbwk, buenx gou majhung, hawj gou gij raeujrub caeuq ligliengh mbouj sat mbouj caenh.

(Gyangh Cinzcinh raiz Luz Lilanz hoiz)