Geu caz rang ndeu、geij go faexcaz, gyuemluemz youq seiz lwgnyez, hawj vunz hoizfeih……

Aen daiz faexraq haj cik langh, baihgwnz bu cieng ceij doj ndeu, henz daiz, daxbuz cingq gaem fwngz dah’iq, baez bit baez veh sij sawhung. Henz daiz ndaw loz caz, heiqndat boqfetfet, aen ciengzgingj neix couh dwg gou lij iq seizhaenx ceiq raeujsim lo. Fajfwngz daxbuz yienznaeuz hwnj daw rim bae, hoeng youh raeuj youh mizrengz, hawj faj fwngz iq gou youq gwnz ceij veh roengz mbat bit daih- it. Gou sij baeg lo, daxbuz couh hawj gou yietnaiq, bouxboux cungj gwn cenj caz ndeu. Codaeuz, gou mbouj ngah cungj “yinjliu feih gvaiq” neix, moix baez heuh gou gwn gou cungj ngauzgyaeuj, daxbuz cungj heuh gou cimz mbat ndeu, euq mbouj gvaq daxbuz, gou cij loq cimz amq iq ndeu. Raemxcaz haeuj bak haemzsaep, “va”, gou biq okdaeuj caez. Doeklaeng, daxbuz riunyumnyum baez dem baez hawj gou cimz amq daihngeih、amq daihsam, gou cij menhmenh ciepsouh gij feihcaz haemzsisi caeuq diemzsisi neix. Raemxcaz henj youq ndaw cenjcaz meng fubfeb, baenz aen geuj iqetet, caeuq aendoz byaleixhoengz ndaw cenj doxingj, heiqhom caz gaenq sanq youq ndaw rumz, rub moix diuz saimeg gou. Geu heiqhom caz haenx, caeuq gij riz ngaeuz gaxgonq, haujlai bi gvaqlaeng, lij niemh youq simdaeuz gou.

Faexcaz ndaem youq laeng ranz daxbuz, geij go faexcaz maj mbouj sang, hix mbouj mwn, engq mbouj miz va hai rim faex、yinx vunz cimyawj. Gou itcig nyinhnaeuz neix dwg faexcab goeng gou seizbienh ndaem, cij aeu daeuj guh lag humx suen. Haujlai bi gvaq- laeng, gou cij rox, moix mbat dauq ranz daxbuz, gwn gij caz de cungj dwg daj geij go faexcaz neix mbaet daeuj. Gou doeksaet liux, cungj aeu ndwn youq baihnaj faexcaz yawj geij baez. Gij caz neix, daj laeng ranz daxbuz daeuj. Go faexcaz baihnaj da, ganjfaex mbouj hung, hoeng daengx gofaex hoenghfwdfwd. Mbawcaz heusausau, caengzcaengz doxdab, maj rim nye. Depgaenh bae mup, geu hom ndeu con haeuj conghndaeng, loq miz loq mbouj, lumj hoenzmok bya gyae, youh gyae- gyang youh moengzloengz; cix youh lumj rub naeng noh gou, youq henz ndang henz fwngz lumj ndaej gaem dawz nei. Geu homcaz neix youq ndaw rumz fouzfouz langhlangh, daengz gizlawz gizde couh caemrwdrwd, aen sim nyapnyuk hix ciemhciemh caem roengzdaeuj. Go faexcaz yawj lumj faex bingzciengz, mbouj ok gijmaz mingz, hoeng de lumj gij vunzndei lajmbwn haenx, gag baenz yiengh ndeu. Geu heu go faexcaz, diemj rongh aen lwgda gou, hix ingj youq ndaw sim gou.

“Daxbuz mwngz couh dwg gwn caz haemz gwn gvenq lo, miz didi van cungj souh mbouj ndaej ne!” Yawj gij yinjliu vansoemj haenx, goeng gou danqheiq naeuz. Dingqnyi coenz vah goeng gangj neix, gou lumjnaeuz mup daengz geu homcaz citceuceu haenx. Seizneix, daxbuz gaenq bae mbwn gvaq lo, dauqngeix mbat doeksat gwn gij caz de caenfwngz goenj haenx, gaenq dwg sam bi gaxgonq lo. Gyanghongh ranzcoj, mbouj miz daxbuz ganq, geij go faexcaz senq mbouj caiq heuloeg. Seizneix, gou ndwn youq gyanghongh, dauqngeix ngoenz dou doengzdoih caj go faexcaz did nyod heu haenx, dauqngeix seiz angqyangz daxbuz youq gyanghongh son gou lienhsaw haenx!

(Liuz Yihanz raiz Vangz Vazdingz hoiz)