Dahsau seizcin buet gvaq suenva seiz, gij ceh doenghgo ndaw suenva did nyod lo, cungj ietok aen gyaeuj iq de, nditndat hawj gyoengqde caemxndang, unqnemnem dwk lax gyoengqde, gyoengqde couh yienghneix vaiqvit majsang lo.

Hoeng youq ndaw aen gex he, miz go nya iq cungj hawj vunz mbouj dawz hwnj da he, de daengx ndang heuauau, mboujmiz gij saek wnq, cawz le boux daxgoeng faexhung ndaw suenva ceiq hawj vunz gingqcungh haenx, mboujmiz byawz yawj de hwnjda, hix mboujmiz byawz siengj caeuq de gangjgoj, de cijndaej ngiengxyawj gij va gyaeundei haenx, youq giz gug giz gex gag daejsebseb.

Moix baez duzmbaj roxnaeuz duzrwi mbin gvaq, daihgya cungj ngiengx gyaeuj yawj, gaen gij mbin hwnj mbin roengz gyoengqde daeuj bi ndang bi gumq, duj ceiq gyaeu ceiq rang haenx couh ndaej duzmbaj roxnaeuz duzrwi haenhndei caeuq gotumj. Hoeng, go nya iq mbouj caengz ndaej gvaq cungj dakdaih neix, de cij deng bouxwnq yawjlawq caeuq huriu.

Baez he, duzmbaj youh mbe vad fajfwed de mbin daengz aen suenva neix, de mbin gvaqdaeuj dingz youq gwnz gyaeuj go nya iq. Youq go nya iq ngamq laihnaeuz dauqdaej ndaej bouxwnq dawz hwnj da seiz, hoeng dauq dingq daengz sing hemq he: “Aiya! Gou baenzlawz douh youq gwnz ndang duzgvaiq yakyawj mwngz ne? Gou aeu vaiqdi liz mwngz gyae di cij baenz, mienxndaej mwngz uq faj fwed gyaeundei gou.” Gangj sat, duzmbaj couh mbin daengz gwnz ndang vameizgveiq bae.

Go nya iq daengz neix dauqdaej nyaenxhoz mbouj roengz lo, raemxda lae- byoegbyoeg. Seizde, daxgoeng faexhung youq henzndang de haenx haibak lo: “Gaej seizbienh doek gij raemxda mwngz, ngiengx aen gyaeuj mwngz hwnjdaeuj, mwngz cungj miz seiz he ra ndaej gij yiyi lix youq lajmbwn mwngz.”

Go nya iq mbouj caiq daej dem, de maegmaeg dawz gij rag swhgeij baek haeuj ndaw namh bae, supsou gij heiq doiq ndangdaej miz bouj haenx.

Seizcin nauhyied haenx couh yaek gvaqbae lo, gij va gyaeundei haenx hix mbouj lumj gaxgonq baenzde ronghsag lo, cungj yaek loenq lo. Hoeng go nya iq neix, cix caegcaeg hai ok baenz duj baenz duj va ndaw suen neix ceiq gyaeu、ceiq hung、ceiq hom haenx, gij ronghgywg lwenqda de seq coh daengx aen suenva, mboujmiz byawz mbouj hozhaenz dwk yawj coh go nya iq seizgonq gig bingzciengz neix.

Gou mbouj gvihaeuj seizcin, hoeng gou miz daengxaen seizhah! Nya iq dinghdingh dwk ngeix.

(Lij Swhcingz raiz Lij Yungzcangh hoiz)