Song dah bouxfugsaeh dawz byaek daeuj lo, song duz bya hung naengj, song vanj gouyuz, song vanj roegbeggap caq, “mbouj miz haeux ni.” Liuz Fanghfangh naeuz, “gou sawq gwn gaiq gouyuz ndeu baenz mbouj baenz gwn.” Doq gangj doq aeu dawh bae nep, “ndeigwn, ndeigwn.” De naeuz. “Liuz Fanghfangh gwn noh hawj gou ndwnjnaiz lo.” Vangz Meijyen doq naeuz doq nep gaiq noh ndeu gwn, “baenz gwn, baenz gwn, hojsik noix lai lo.” Vunzcungnienz cam: “Song daih vanj lij noix?” Daxmeh Vangz Meijyen naeuz: “Dungx iek gokda hung, gauhneix byaek gwn ndaej caez mbouj？”

Daeg lwgmbauq fugsaeh ndeu dawz bat hung coux haeux daeuj, Vangz Meijyen daek liux, Liuz Fanghfangh doq daek, bouxboux gwnguk, gwn vanj haeux ndeu caez le nep gwn gouyuz, daek vanj haeux daihngeih, gwn caez le youh daek vanj daihsam, song dah lwgnyez lumj doxdax nei, moix vunz gwn haj gaiq gouyuz le cuengq vanj. “Gou gwn imq lo.” “Gou hix gwn imq lo.” Boux ciep boux naeuz.

“Doq gwn imq lo?” Vunzcungnienz miz di dwgriu, naeuz: “Youh naeuz dungx gaeuq iek lo, baenzlai byaek ngamq gwn bae di ndeu？”

Daxmeh Vangz Meijyen hix naeuz gwn imq gvaq, vunzcungnienz hix naeuz gwn imq gvaq, song duz bya hung naengj caengz doengh.

“Lauxau, mwngz diemj byaek daiq lai lo.” Liuz Fanghfangh naeuz. “Baenzlawz guh ha?” Vunzcungnienz cam. “Daiq sai lai lo.”Vangz Meijyen naeuz. “Baenzlawz guh?” Vunzcungnienz lumj hawj song dah lwgnyez cai vahduenz nei cam. Liuz Fanghfangh naeuz: “Vunz hawj raeuz duk baema mbouj?” Vunzcungnienz naeuz:“Gou baenzlawz rox.” Vangz Meijyen naeuz: “Dou cawx saw hai cienz ndaej dawz baema, lauxau hai cienz cingj dou gwn haeux, byaek gwn mbouj caez, wnggai dwg lauxau duk bae ranz, bouxwnq mbouj miz swhgwz lanz.” Liuz Fanghfangh naeuz: “Dwg lo, lauxau dawz baema caengh mbouj sai.”

“OK!” Vunzcungnienz naeuz: “Gou couh mbouj aeu lo, baen guh song faenh hawj sou dawz baema menhmenh gwn.”

De vadfwngz, dahsau fugsaeh ndeu gvaqdaeuj, aeu geij aen daehsuliu daeuj duk ndei, cang haeuj song aen daehriuj yaenq miz “Hom Gag Daeuj Bouqhaeux Hung” bae.（31）