Gwnz laeuz ranzgaeuq cungj miz gij sing ndeu. Moix daengz gyanghwnz caemrwgrwg, lumjnaeuz ndaejnyi sing cozcubcub ronghndwen daj congh ciennamh ndonj haeujdaeuj, lijmiz gij sing daeuq yinx mae daj ndaw rok daxmeh cienz daeuj, youq ndaw geizheih gizlaeg de menhmenh doekroengz.

Aen rok daxmeh youq gwnz laeuz baihsae henz conghcueng. Aen rok faex ngaeuzngwt, diuzfaex baihgwnz gungj lumj ronghndwen, diuzcag doxbae doxdauq venj youq laj ronghndwen. Daxmeh cungj youq mwh ranz mong diemj daeng naengh youq henz rok, aen daeuq youq ndaw fwngz de baebae dauqdauq, lumj duzbya ndonj youq geh ndaundeiq nei, song ga caij diuz benj lajdin ngutnget ngutnget. Gou ciengzciengz boemz youq henz mbonq yawj daengyouz ingj aen ngaeuz de haeuj gwnz ciengz bae, yaep hung yaep iq bi bae bi dauq, sing rok “gaz daz gaz daz” caeuq aen raemhngaeuz hwnjhwnj roengzroengz. Caj gou rox di saeh, mizseiz youq yaek haeujninz seiz sien bang daxmeh daz mae roux faiq guh maeloek. Daxmeh caemh haenh gou majhung roxsoq lo.

Ndwenlab baihrog rumz biufufu, mbwn nit dangqmaz, daxmeh engq roengzrengz gaenjgip daemjrok, mbangjbaez haemh ndeu ndaej daemj baenz diuz gaen’gyaeuj raiz. Aenvih daxmeh daemj baengz guh ndaej ndei, gyoengq bouxgeq caemh dingh cawx de aeu. Daxmeh ranz rongh guh hongnaz, ranz laep couh hainduj laebdaeb daemjrok. Mbwn nit fwngz dek, fajfwngz co, de couh aeu deuz baengz geuj dwk, diuzmae gaet haeuj geh noh dek bae, lwed lae hwnj geh baengz hau, cimq ndaej lumj duj vamoiz. De cungj naeuz:“Mae aeu soh, baengz aeu bingz.”Hoeng geij bi de daemj gij baengz haenx cungj miz di gannanz, mbwn nit seiz de boq heiq raeuj fwngz, ngoenz nditndat de iet fwngz uet hanh, seizcin fwnmoenq biu haeuj aenrok dwk baengz.

Geiq ndaej dwg ngoenzhaw ndeu gyanghaemh, daxmeh bae haw gai gaengyaeuj raiz dauqma, mwhde diuz gaen’gyaeuj cij ndaej 2 maenz ngaenz. Daxmeh mizseiz daj ndaw daeh cang gaen de mbon ok di dangz baen hawj dou sam boux, dou cix humx aen rok youh saet youh ciengq. De menhmenh mbon ok cienz daeuj geq, naeuz caj rom gaeuq couh hawj dou moix boux cawx geu buh moq ndeu, hoeng dou lijdwg daenj geubuh fong bae fong dauq de. Bi 1995, gou gauj hwnj cunghconh, daxmeh lijdwg gyangngoenz guh hongnaz, banhaemh laebdaeb daemjrok soengq gou doegsaw.

Seizneix aen daemjrok daxmeh gaenq dawz bae ndaengjfeiz lo, hoeng moix daengz fwn doek roq daengz conghcueng, gou cungj loq naeuz dwg sing goksag daemjrok daxmeh. Mbwn menhmenh ronghsag, yienzlaiz diuz- mae dwg daxmeh yungh bwngyaeuj hau daemj baenz, youq ndaw ndwenngoenz, sing daemjrok daxmeh buenx gou baenzhaemh anyienz haeujninz.