Gij ndit haetromh ngamq loh naj, gij ndit saekgim haenx couh unqswnh dwk saj daengz aen cin iq neix, gyaepsanq gij gyoetnit gyanghwnz haenx. Aen hawromh cin iq hix youq nditraeuj ciuq rongh seiz cugciemh dauqsingj gvaqdaeuj, ndaw haw ciemhciemh miz sing vunz hemqhuhu hwnjdaeuj, nauhyied dangqmaz.

Youq gwnzhaw, boux canghbuenq haenqrengz heuh gaicawx, senhconz gij huqgai swhgeij. Bouxcawx con dan neix dan de, genj gij huq swhgeij simhaengj haenx, gij sing gangj gyaq neix hwnj haenx roengz, comzgyonj baenz hot fwen lai sing, saek rim gij heiqsik vunz raeuz gvaq ndwenngoenz haenx.

“Gai bya lo, bya neix ngamq daj ndaw haij lauz hwnjdaeuj bw!”Dangqnaj danbya,vunz ndaetfoedfoed, bouxcawx boux caenx boux bae genj gij bya swhgeij yaek cawx haenx. Aenvih seng’eiq hoengh lai, daeggo gai bya haenx hanh lae hanh roenx, hoeng fajnaj cix riu baenz dujva.“Cejdaih ha, dwg mbouj dwg hawj gou coengh mwngz gvat gyaepbya ne?”Ndaej bouxcawx ngaek gyaeuj le, cijraen fagcax ndaw fwngz daeggo gwnzlaj boekbinq,“ca ca ca”yaep he couh gvat ndei gyaepbya, dinfwngz seuqset, liuxcih byotbyat cingleix ndei gij dungxsaej duzbya, vut hwnj aen caenghdienh bae, yawj gij gyaqcienz gwnzde da ndeu,dawz bya cang haeuj aen daehsuliu bae, ndenq hawj bouxcawx. Daeggo neix doq ciep ngaenz bouxcawx neix oet haeuj ndaw ngaenzbau bae youh doq yiedcingz dwk bae dongx bouxhek wnq, cam gyoengqde yaek aeu gijmaz, doengzseiz naj riunyumnyum, unqswnh dangqmaz.

Youq doiqnaj caix daeggo gaibya neix, dwg aen dan gai gienghduh boux daxheiz he, gij heiqrang heiqndat gienghduh gyuemluemz youq ndaw rumz, ciuyinx gij vunz baebae dauqdauq haenx gvaqdaeuj, youq dangqnaj aen dan iq bouxcawx gaenq baiz baenz hangz vunz raezrangrang. Daxgoeng daxbuz maij gwn gij gienghduh feihdauh gagguh haenx; daxau baujanh ngamq roengzban haenx ngah gwn gij giengh duhndaem ndaej bouj naengzliengh haenx; gyoengq lwgnyez yaek bae hagdangz haenx youh gyaez gwn gij gienghduh cuengq makcaujhoengz vanyupyup haenx…… Aenndang dax- heiz gai gienghduh nyaengqfoedfoed haenx youq ndaw heiqndat yaep raen yaep mong, de hai aen gihgienghduh fwngz bienz dangqmaz, dawz baez cenj baez cenj gienghduh homswdswd haenx ndenq hawj bouxcawx. Aenvih gwn ndaej habhoz, gwnz naj gyoengq bouxcawx angq- vauvau, miz di menhmenh cimz gij rangdiemz gienghduh, miz di dawz gienghduh dauqbae daj- suenq youq gwnz loh cij gwn.

Lijmiz danbingjcien、danlwgmak、danbyaek……Gij aendan gak cungj gak yiengh haenx, doengzcaez comz baenz aen hawromh nauhyied youh nyaengq- nyatnyat neix. Gyoengq cawjdan bakmbaeu dongx bouxcawx, gwnz naj riunyumnyum, yienh’ok gyoengqde dwg vunz simsoh. Gij ndit gyanghaet saj youq gwnz ndang gyoengqde, gyoengqvunz gaenxguh neix caemhdoih comz baenz fuk veh ceiq gyaeundei he.

Fuk veh neix, dwg veh gij saedceij ngoenznaengz vunz dangdieg cin iq, hix yienh’ok gij cingsaenz fungmauh gaenxguh simsoh、sim’angq haenq- rengz gyoengqde. Youq baihlaj nditndat ciuq rongh haenx, fuk veh neix daegbied sengdoengh, saek rim rengzhoengh caeuq maqmuengh.

(Ciz Nihgoj raiz Lij Yungzcangh hoiz)