Moix baez gou fan bonj saw《Gojbeij Yihsoz》 neix seiz, couh lumj byaij haeuj aen seiqgyaiq saek rim gij goj coengmingz caeuq geizmiuq haenx. Moix aen gojgaeq iq cungj lumj ndaundeiq gwnz mbwn set ok gij rongh maezvunz haenx.

Ndaw saw, miz aen gojgaeq ndeu, hawj gou yaenqsiengq daegbied laeg. Aen goj neix couh dwg《Duzngwz Caeuq Duzyiuh》. Ndawde dwg gangj duz ngwz vaddaeuz he caeuq duz yiuh maenh’ak he doxhoenx seiz, duzyiuh mbouj siujsim deng duzngwz geujheux lo. Couh youq mwh yungyiemj gaenjgip neix, boux vunzguhnaz simsoh ndeu gvaqdaeuj yaeng’yaeng dawz duzngwz gej deuz hawj duzyiuh mbin bae, hoeng, aenvih gienh saeh neix duz ngwz haenx gig hozndat, de couh naemj baenzlawz bauqfug bouxguhnaz neix. Couh yienghneix, de couh guhcaeg dawz gij myaizdoeg de cuengq daengz ndaw raemxgwn bouxguhnaz bae. Bouxguhnaz lij mbouj rox gienh saeh neix, mwh de yaek gwn gij raemx cuengq miz myaizdoeg haenx, duzyiuh ndaej gouq haenx mbin gvaqdaeuj lo, de vaiqvid dawz bingz raemx dik laemx bae, couh yienghneix, duzyiuh gouq ndaej diuzmingh bouxguhnaz lo.

Aen goj neix hawj gou rox：Raeuz aeu lai guh saehndei, aenvih vunzndei cungj miz fukbauq, couh lumj coenz vah bouxgeq naeuz nei：“Bingzseiz haengj bang vunz, gipseiz miz vunz bang.” Ndigah, moix baez raeuz raen bouxwnq bungz nanh seiz, aeu iet fwngz bae doxbang, caenh gij rengz raeuz bae bang gyoengqde, yienghneix, danghnaeuz raeuz swhgeij bungzdaengz gunnanz, cij miz vunz nyienh iet fwngz daeuj bang raeuz.

Ndaw bonj saw《Gojbeij Yihsoz》neix lij miz gojgaeq iq haujlai haujlai, moix aen gojgaeq iq cungj cang miz gij dauhleix laeglaeg bae. Gij dauhleix haenx couh lumj gij rumz unqswnh ndaw seizcin, yaeng- yaeng dwk ci deuz gij nyapnyuk gou; gyoengqde youh lumj boux lauxsae iq henzndang gou, naihsim dwk vix aen fuengyiengq hawj gou byaij baenaj; gyoengqde youh lumj baenz aen baenz aen daeng nei, ciuq rongh diuz roen majhung gou, hawj gou youq gwnz roen ciuhvunz mboujcaiq maezmuenh.

Gyonj daeuj gangj, 《Gojbeij Yihsoz》dwg bonj saw ndei cig ndaej bae doeg ndeu, de hawj gou rox dauhleix gig lai gig lai, hix hawj gou bienq ndaej engqgya coengmingz caeuq roxsoq. (Cinz Swjyinj raiz

Vangz Siujyinh hoiz）