Hagdangz gou aen bi seiqgeiq cungjdwg gyaeundei dangqmaz, gij gingjsaek gak geiq gak mbouj doengz. Seizcin lumj boux lwgsau iq saetlaex nyumnyum, seizhah lumj bouxmbauq manz, seizcou cix lumj daxbuz unqswnh, seizdoeng youh lumj goenggeq najhaenq yiemzsuk haenx.

Baez daengz dahcin yamqdin mbaeufengfeng byaij haeuj ndaw hagdangz, daiq daeuj fukveh moq doenghgo hoizsingj yienghyiengh vuenh saeksiengq. Go’nywj laeglemx iet gyaeuj okdaeuj, geizheih dwk damqyawj seiqgyaiq baihrog. Gyoengq gova ciengj gonq lau laeng dwk loh aen naj okdaeuj, baenz go baenz go faexsa lumj baenz baiz bouxbing ityiengh, angqcoux gyoengqdou daeujdaengz. Aen dingz “Hingzcihdingz” gaeuqgeq haenx dwg aendieg guh’angq dou, baez roengzdangz, gyoengq nyezdoih cungj haengj daeuj ndawdingz, mizmbangj yawjsaw, mizmbangj lwnhgoj, mizmbangj guhcaemz, ndaw hagdangz gizgiz sing angq sing riu gyuksasa.

Seizhah daeujdaengz, hagdangz nditndat biknyannyan. Gwnz dieg deng ndit ciuq ndaej ndat lumj saeuqfeiz ityiengh, ciuq ndaej aennaj gyoengq doengzhag ndatndo’ndo. Duzbid douh youq gwnz faex swenjngednged: “Dai ndat lo, dai ndat lo!” Ndat daengz go’nya gova ngiengx gyaeuj mbouj ndaej bae, gyoengqde cungj muengh doek ciengz fwn ndeu. Sawqmwh, gwnz mbwn fwjndaem laepbumbum, mbouj geij nanz, raemxfwn lumj miz vunz aeu bat dauj raemx nei doeksasa. Fwnraq gvaq le, faex engq heu lo, va engq hoengz lo, cauhcangz deng swiq ndaej seuqsatsat.

Seizcou, gij mbawfaex henj youq gyangmbwn mbinyagyag, go’nywj hix vuenh geu buhhenj daenjninz haenx. Seizneix, bak va reuqloenq, hoeng vagut dauqfanj hai hoenghfoedfoed, heiqrang biu rim seiqlengq, hawj gou nyaenx mbouj ndaej ngeix daengz coenz sei Suh Siz raiz haenx: “Mbawngaeux reuqroz mbouj gang liengj, vagut cenghai buenx naefiengz.” Vagut hoenx nae dingj cengx, caen ak lai lo!

Seizdoeng, ciengz siet ndeu hawj ndaw hagdangz bu caengz damj hausak ndeu, suenva caeuq gij faexhung bangxhenz cungj hoemq fan denz raeujrubrub, gyoengqde ninz ndaekngaeungaeu, ndaw hagdangz gizgiz naesiet hausaksak.

Aen hagdangz deng bouxsien seizgan dajcang ndaej caen gyaeundei ha!

(Dangh Yijsenh raiz Vangz Caijsen hoiz)