Aenmbanj youq ndaw fwn cungj dwg caemrwgrwg, unqswnh gyaeundei. Naedfwn yien fajfwngz gou, yaeng’yaeng coh goengq bya gizgyae byaij bae.

Haetromh, youq ranz daxbuz, gou ciengzseiz deng singfwn heuh ndiu. Naedfwn biufengfeng diuqyetyet， lumj mbouj rox cihgeij yaek daengz gizlawz bae nei doek roengz gwnz namh bae. Ninz hwnq le，hai da yawj gij bya heufwdfwd goengq dab goengq gizgyae, yawj duz gaeqmeh youq ndaw fwnmoenq vat namh ra gwn haenx, youh baenzlawz cimz mbouj daengz geij faen yinxdaeuz lajmbanj ne? Roengz laeuz daeuj le, rumz gebdawz fwnmoenq boq haeuj naj daeuj，cab dawz gij heiqdumz fwn haemhlwenz caeuq gij heiqhom namh, hawj aen ukgyaeuj bongzbwdbwd fumxfwd singj lo.

Ok dou le, youh raen geij duz roeglaej douh youq gwnz ganj densen najranz, aenvih fwn rwed le aen ndang luenzlulu cix bienq baenz henjgeq, gyoengqde youq ndaw fwn caemdingh mbouj doengh.

Daengz banringz, fwn hung lo, geij aen ranz lajbya couh lumj deng fwn gyangwn lo, ngamq raen geij vengq vaxnding dingjranz, oenq caeuq fwn youq gwnz bak conghheuq heuxgeuj doxsan, nanz gej nanz faen. Baenq ndang yawj bae, gij ndoeng faexndoek souh mbouj ndaej fwn rwed, gogo ngaem gyaeuj gungj hwet, deng raemxfwn gaemh ndaej doeng laemx sae ngeng. Hoeng, duzyiengz ndaw ranzhaz baenzlawz miz cungj beizheiq ndei baenzneix, gyoengqde fanz dwk daemh din, iet hoz ngiengx gyaeuj sangsang bae, “mbe mbe” mbouj dingz dwk heuh, lumjnaeuz doiq ciengz fwnhung neix gig mbouj muenx.

Banringz gvaq, fwn ciemhciemh iq lo, loh iq gwnz bya namhboengz mbaeqmbatmbat. Gij dieg suijniz najranz deng raemxfwn cung ndaej seuqfwt ronghsag. Gij raemx ndaw daemz rim lo, gij raemx ndaw daemz mwhnduj sawrikrik haenx deng gyaux ndaej noengznaunau, bienqbaenz aen daemz raemxnaez ndeu. Youq gwnz raemx, lij saekseiz raen geij duz bya iq youq ndaw raemx guhcaemz, sinz hwnj baenz duj baenz duj va raemx iq.

Haemh lo, fwn dingz lo, daengx mbanj caemdingh. Gaeqmeh bi ndang ma ranz haeuj laeuz lo, duzyiengz hix mbouj caiq hemq “mbe mbe” lo, youq ndaw laepnyamq iet fwngz mbouj raen haj yiengh, seiqgyaiq lumjnaeuz deng caengz baengzsa ndaem nanwtnwt ndeu goemq dwk. Muenghyawj gizgyae, gij daeng ronghriri ndaw ranz lajbya，cingq lumj gij ndaundeiq yaep rongh yaep myab gwnz mbwn laep haenx.

Gyanghwnz caemrikrik, saekseiz dingqnyi geij caek fwn doek roengzdaeuj, yaep he couh gvaqbae lo, lumjnaeuz deng aen ndoengfaex youh laep youh laeg neix laeglemx gyangwn. Cijmiz duzbid youq ndaw rongz lumj fangzhwnz loq yienghneix ciengq go, lij miz duzgoep youq haenznaz hemqngo’ngo, lumjbaenz souj go ndei dingq gvaq hwnz haenx, youq gwnz mbanj andingh haenx heux bae geuj dauq.

Gij fwn lajmbanj bienq lai bienq daih, youq ndaw yaenqsiengq gou, cijaeu dingqnyi gij sing fwn doek roengz gwnz mbawgyoij, dauqngeix couh geiq haeuj ndaw sim bae, gaenlaeng couh haengjgyaez gij fwn neix. Hoeng gij doxgaiq ndaw fwn haenx cungj miz gij gyaeundei gak cungj gak yiengh, raen gvenq nauhyied hawsingz le, hix youq lajmbanj swiq ciengz fwn moq ndeu ba!

(Cangh Yuzhih raiz

Dwngz Dwngz hoij）