Ngoenzneix banhaet, ngamq doek raq fwn iq he, hoengheiq bienq ndaej dumzsubsub, ndaw daizva miz haujlai saehaexma iq. Seiz roengzdangz, gyoengq doengzhag cungj gungj hwet youq ndaw byozrum ra bauj, gou hix ra ndaej duz saehaexma iq dwggyaez ndeu, couh aeu mbaw faex daiz de cuengq youq ndaw hab yienzbit.
Gou sijsaeq cazcawj duz saehaexma iq neix, gwnz gyaeuj de dingj miz song doiq mumhgaeu, doiq ndeu raez, doiq ndeu dinj. Gizsaed, gou senq youq gwnz《Cozvwnz Cauhmoq》yawj gvaq, da saehaexma couh maj youq gwnz doiq mumhgaeu raezrangh de, ndigah gou daegbied cazyawj doiq mumhgaeu raez haenx, baihgwnz faenbied miz aen diemj fonx iq he——De wnggai couh dwg da saehaexma iq lo! Hoeng youq laj doiq mumhgaeu dinj, miz aen congh gig mbouj dawz da ndeu. Ciengzseiz, aen congh neix cungj dwg haep maenh, nanz mbouj nanz cij hai baez he. Mwngz itdingh cai ndaej ok lo, de couh dwg bak saehaexma iq!
Gij ndang saehaexma iq youh raeuz youh haux, aenvih de rox conh ok di haux, gij haux neix mboujdanh ndaej bang de nod ning, lij ndaej hawj de mbouj dai hawq. Gou nyinhnaeuz, gij haux neix cawzliux hawj ndang de raeuz、ndang mbouj hawq, lij ndaej baujhoh de mbouj deng bouxwnq sienghaih. Yawj, boux caeuq gou caemh daiz Siujvangz raen gij haux neix goemq naj dwk, singhung hemq le buetdeuz lo. Ha ha, neix mbouj couh dwg gij fuengsik baujhoh bonjfaenh saehaexma iq ma?
Miz vunz naeuz, saehaexma dwg gyod ndang byaij, gou nyinhnaeuz gyoengqde naeuz loeng lo. Aenvih gyod gij suzdu wnggai gig vaiq, hoeng gou mbouj caengz raen saehaexma iq gyod ndaej vaiq gvaq. Saehaexma iq gou dwg it di it di nod bae naj, couh lumjbaenz ciencien fanhfanh gaiq ga iq haenqrengz yamq baenaj. Ndigah, cingj gaej caiq yungh “saehaexma” daeuj gangjnaeuz boux gikgyanggyang lo, saehaexma dwg duz gig roengzrengz ho!
Eiya, saehaexma iq vihmaz suk haeuj ndaw gyamq bae ne? Gou sijsaeq cazyawj, lauheiq de youq ndaw gyausiz nanz lai lo, haidaeuz gij ndang de mbaeqmbatmbat bienq hawq mbouj noix. Gou ganjgaenj dawz aenhuzbyoq daeuj, menhmenh byoq raemx hawj de. Mbouj geij nanz, saehaexma iq ndonj okdaeuj, de youh cak ak lo!
Gou ngeix le ngeix, mbouj ndaej cungj hawj saehaexma iq youq ndaw gyausiz sauj neix, mboujnex de hojyouq lai lo! Liuxle, gou dawz de ok gyausiz bae, cuengq dauq byozrum.
Danghnaeuz gou siengj de lo, caj doek fwn baez moq liux, gou caiq bae gyang byozrum caeuq de raennaj!
(Bauh Hanz raiz
Veiz Yen’gyangz hoiz)