Mboengqgonq, lauxsae daiq dou bae ndaw nungzcangz gvej haeuxnaz.

Baez daengz nungzcangz, lauxsae couh gangj gij cihsiz haeuxnaz hawj dou nyi. Youq mwh guh doxcam dox yaenglwnh hozdung, lauxsae cam dou: “Bouxlawz rox go haeuxnaz ndeu daih’iek maj geijlai va?”Gou mbouj lawq saekdi han naeuz: “Daih’iek miz 200 duj va!” Lauxsae youh doeksaet youh angq, haenh naeuz: “Cangh Senhnoz doengzhag caen coengmingz!” Gou dingq le ndaw sim angq dangqmaz, lumj ndaej gwn dangzrwi nei diemzsubsub.

Lauxsae daiq dou byaij haeuj ndaw naz haeux henjrwgrwg haenx bae. Gou yawjraen, gwnz haenznaz baek miz geij boux mauhnyinz, couh angq dwk naeuz: “Doengh gij mauhnyinz neix caen daegbied, baek de youq gizneix baij hawj vunz yawj lij haemq ndeiyawj bw!” Lauxsae riu dwk naeuz: “Gij mauhnyinz neix mbouj dwg baij hawj vunz yawj! Baek de youq gizneix, dwg fuengz duzroeg iq daeuj dot gwn rienghaeux.” Lauxsae gangj le, couh fat boux fag liemz iq hawj nyezdoih dou.

Gou dawz fagliemz daeuj gvej haeux. Hoeng cib faen cung gvaqbae lo, gou cij gvej ndaej di haeux ndeu. Lauxsae raen le, byaij daengz henz ndang gou, de naihsim son gou: “Aeu gaem gohaeux gonq, caiq yungh liemz gvej goek go- haeux……” Gou fwt cij rox lo, couh ciuq gij fuengfap lauxsae bae gvej, gig vaiq couh gvej ndaej gwed haeux hung ndeu lo.

Gou umj gij gohaeux ngamq gvej roengzdaeuj haenx, riengz lauxsae daeuj daengz aen gunghcangj gyagoeng haeuxnaz ndeu.

Youq ndaw gunghcangj, gou hag gij yienghceij nungzminz bohlungz, gaem gohaeux hwnjdaeuj, baez dem baez yungh rengz fad gwnz faex bae, doengh gij naed haeux fagcagcag haenx cungj doekfoenfoen youq gwnz dieg. Cijdwg ngamq yaep ndeu, gou couh mboujmiz rengz lo. Hoeng, yawj gij haeuxgok rim dieg haenx, gou roxnyinh rimhoz caeuq miznaj lai.

Guh hong sat le, dou daeuj daengz dieg guh haeuxsei ndeu. Miz daxgoeng ndeu hozunq dwk naeuz: “Gyoengq nyezdoih, sou cungj baeg luba? Gou guh gaiqgwn ndeigwn hawj sou bw!” Gangj dwk, couh dauj cenj haeuxhau ndeu haeuj ndaw aen boemz haeuxsei bae. Gou ngeizvaeg cam:“Haeux baenzneix noix, gaeuq dou baenzlai vunz gwn lwi?” “Gaej yungh you, yaep ndeu sou couh rox lo.” Daxgoeng doq gangj, doq baenq aenboemz. “Daihgya goemq rwz!” Gvaq yaep ndeu le, daxgoeng dawz aen daeh raezrangrang ndeu soeb youq gyaeuj aenboemz, riunyumnyum daezsingj dou. Gou lauxlaux saedsaed goemq rwz, dingq daengz “boem” sing hung ndeu, raq heiq rangfwdfwd ndeu coemj haeuj ndaw ndaeng daeuj. Gou sikhaek buet gvaqbae, gaem gaem haeuxsei oet haeuj ndaw bak bae, caen rang ha!

(Cangh Senhnoz raiz

Veiz Yennaz hoi)