Rumz cifefe, raeujremrem, daiq gij siusik seizcin daeuj daengz lo. Gij naehang ndawdah cieg lo, raemxdah laesoso, ciengq gij go seizcin lo. Ndit raeuj laeglemx ciuq hwnj gwnz raemx, lumj naeuz hawj gadah longz caengz sagim ndeu, yawj ha, bang bitiq ndeu deng ciuyinx daeuj lo, youq ndaw raemx guh’angq ne, caendwg “cin daengz raemx raeuj bit rox gonq”! Haenzhamq, daihdeih duet geu buhfaiq aeu siethau guh de bae, vuenh geu buh heucing ndeu. Go rum’iq vazmuengz damqgyaeuj ok gwnznamh daeuj, caeuq gyoengq doengzdoih iq maj coh daengngoenz. Va gyangdoengh baenz caz baenz caz, hai youq laj ndit, gyoengqde yienznaeuz gyaeu mbouj gvaq vamauxdan、vameizgveiq, hoeng gyoengqde yawj hwnjbae hoengh- fwdfwd. A, ngoenzcin rangfwtfwt!

Ciengz fwncin daih’it doek roengzdaeuj lo. Duzroeg gvai ndeu guhlumj naeuz rox seizcin daengz lo, youq byaifaex hai hoz ciengq go. Ciep dwk, cienfanh duzroeg doxgap ciengq go, baebae dauqdauq “boqcuengq” “go seizcin”, yo! Gyang rum gawqyienz miz diuz rieng heu ndeu okyienh, w, dwg duz ngwzheu iq haenx! Yawj daeuj de hix singj lo! Fwncin doek, hongnaz nyaengq. Boux vunzguhnaz daenj gyaep gwed gvak, hai hong lo! Gyoengq lwgnyez hix duet buhgoeb bae, vut haizfaiq bae, youq gwnz dieg rumheu buet bae buet dauq. A, ngoenzcin hoenghfwdfwd! Angq- vauvau!

Geij ciengz fwncin gvaqlaeng, go’ngaih did ok nyodnomj. Byaij youq gwnz roenbya, roenbya homq youh raeuz, ndaw lueg cungj hom gij heiq go’nywj. Henz roen iq laj byoz gocaz, hwnj haujlai go’ngaih, gyoengqde gogo iqningning, byai mbaw venj raemxraiz, raemxraiz ndongqrikrik, hawj vunz yawj liux sim’in simgyaez. Gou gaeuz hwet roengzbae aeu fwngz mbaet, gij nyod go’ngaih couh doek haeuj ndaw lamz bae lo. Byai fwngz ce caek raemx go’ngaih ndeu, yaengx- fwngz mupmup, hawj vunz gyaeuj singjsak, sim vuenyungz. Mbouj rox mbouj nyinh couh mbaet ndaej lamz rim lo. Gou ndwn hwnjdaeuj, rubrub fajga, yawjyawj gij raemxraiz, sim- angq simhai ma ranz lo. A, ngoenzcin caen angqyangz!

Youq lajmbanj, ngoenzcin boekbienq lailai, ngoenzcin rangfwtfwt, ngoenzcin hoengh- hwdhwd, ngoenzcin engq dwg angqfwngfwng!

(Vangz Anhgiz raiz Vangz Vazdingz hoiz)