Gou okciuh couh damj iq, doegsaw ciengzseiz ngaiz vunz dub, ndigah cuengqhag ciengzseiz youq hagdangz daej daengz ranz.

Gij saeh neix hawj boh gou cibfaen gyaeujdot, de naemj baenzlawz cij ndaej hawj gou ak hwnjdaeuj.

Caen dwg mbouj miz banhfap dahraix. Meh gou bae hagdangz ciep gou seiz, caeuq banhcujyin naeuz gvaq，hoeng cungj mbouj miz yungh，moix baez cuengqhag，gou lijdwg doq daej doq ma ranz.

Lauxsae guenj mbouj ndaej, boh gou caeuq meh gou siengliengz bae siengliengz dauq, siengliengz mbouj ok gijmaz banhfap ndei.

Couh yienghneix，meh gou lijdwg moix ngoenz caeuxcaeux bae daengz bakdou hagdangz deq gou, demq yawj bouxlawz doengh fwngz dwk gou. Hoeng doengzhag dingzlai youq gug ranzsaw beng byoemgyaeuj gou, daxmeh baenzlawz yawjraen, gou ciuqgaeuq daej okdaeuj.

Vih gij saeh neix, bohmeh doxceng haujlai baez, boh naeuz meh mbouj deng, meh naeuz boh mbouj dwg, hemqsatsat, luenh mbouj dingz.

Miz ngoenz ndeu, boh gou sawqmwh doiq meh gou naeuz: “Ngoenzcog gou bae ciep dahlwg, gou yawj bouxlawz gamj hangz dahlwg gou.”

Daxmeh najsaep naeuz: “Yawj mwngz soh lumj aen mbaengq nei, bouxlawz lau mwngz?”

Vihliux gou, daxboh guh dahraix lo. Ngoenz daihngeih, daxboh daegdaengq bae daeq aen gyaeujndoq ndeu，lij cawx aen gingqda ndaem ndeu. De ndwn youq bakdou hagdangz, da caengz- ngaungau, gyoengq doengzhag haephangz gou haenx raen daxboh gou yienghneix, couh vaiqvaiq ndoj bae gyae’gyae lo, mbouj gamj daeuj gyawj gou.

Gvaqlaeng, gou caiq mbouj daej dauqbae ranz lo，caiq mbouj miz vunz dub gou lo. Miz ngoenz ndeu，gou laeglemx naeuz daxboh: “Boh ha, gou naeuz aen mimiz hawj mwngz.”

Daxboh riu naeuz: “Lwg laux lo, couh miz mimiz lo.”

Gou sim’angq naeuz: “Daxboh, gyoengq doengzhag lau gou lo, caiq mbouj gamj dub gou lo.”

Daxboh naeuz: “Vih gijmaz?”

Gou dep rwz daxboh, gangj iqiq naeuz: “Gou naeuz vunz lai nyi——Boh gou dwg bouxvunz gig manz ndeu.”