Seiz lwgnyez, baez daengz ndwensam ndwenseiq, ceiq ngah ceiz byaekngaih. Ndigah, gou cungj gyaep youq baihlaeng yahdaiq cam, yahdaiq riuhihi doiq gou naeuz, caj rumzcin ci gvaq doenghnaz, gwnz dieg heufwgfwg le, raeuz couh ndaej gwn ceiz byaekngaih lo.

Fwncin gvaq le, ndaw rumz cungj rang gij heiq moq namhdoem caeuq go’nywj. Yawj gvaqbae, dauqcawq cungj heufoedfoed lumj haij nei, gwnz faex、byai mbawnywj cungj venj baenz naed baenz naed raemxraiz ndongqrikrik, yawj hwnjbae hoenghhwdhwd. Gou youq ndaw doenghgo heuswdswd haeujsim ra go byaekngaih, cungj dwg vaiqvit couh ra ndaej, yahdaiq ciengzciengz haenh gou lwgda soem.

Mbaet byaekngaih ma ranz le, aeu dawz gij namhfaenx swiq deuz, caiq dwk roengz ndaw rek hung bae cawj cug. Gij byaekngaih cawj cug haenx, biu ok gij feihdauh rangrwgrwg. Gou seizneix, cungj mbouj rox mbouj nyinh dwk deng gij feihdauh rang neix yinx haeuj ndaw ranzdajcawj bae, gij rang neix dwg seizcin gag miz. Gaenlaeng, yahdaiq dawz byaekngaih daem baenz naezbyaek, caeuq mba haeuxcid doxgyaux, caiq baenj baenz ndaek ceiz hung ngaeuzyubyub ndeu.

Guh ceiz byaekngaih, ceiq “miz feih” dwg duk hamh lo. Haujlai dwg hamh duhdoem、lwgraz……diemz youh mbouj nywnx. Gij hamh gou ceiq gyaez gwn haenx dwg hamh duhdoem, unqnupnup, haeb amq ndeu haeuj bak, feihrang biu gvaqdaeuj, unqniu daengz ndaw sim bae.

Dou dawz ndaek ceiz hung faen baenz aen iq, nap gok ndei, dwk hamh, caiq yaeng’yaeng gop red, laenx luenz. Ceiz byaekngaih guh baenz le couh dwk roengz ndaw caengq bae, hai feiz hung naengj cib lai faen cung. Seizhaenx, lwgda gou cungj mbouj yaep dwk cim coh aen caengq, cib lai faen cung gvaq dwk raezrangrang. Caj daengz hai facaengq seiz, yawjraen gij ceiz byaekngaih gou naemj baenz bi haenx lo. Luenzlulu, baihrog duk caengz saek heuoiq he, saek neix dwg ceiz byaekngaih gag miz, lumjbaenz duk aen seizcin hoenghhwdhwd he.

Gij ceiz byaekngaih naengj cug haenx, unqvan youh daiq miz di rang go’ngaih. Haeb amq ndeu, gij hamh de roenx youq ndaw bak, gij rimhoz haenx, cungj ndaej dawz gij dwgrengz sinhoj gyaep deuz caez. Moix daengz seizneix, daengx ranz vunz doengzcaez naengh youq itheij, cimz gij ceiz byaekngaih yahdaiq guh haenx, faenh vuenyungz caeuq angqyangz haenx, beij gijmaz cungj bengz cungj dij.

Moix baez naemjdaengz ceiz byaekngaih, gou couh mbouj rox mbouj nyinh naemj daengz yahdaiq. Siengjniemh ceiz byaekngaih, aenvih ndaw ceiz byaekngaih cang miz mwh vuenyungz raeujrub ranz vunz dou.

Aen ceiz heuneu iqet neix, mboujdanh duk hamh duhdoem, engq dwg duk gij gyaez yahdaiq gyaez gou caeuq gij gyaeundei angqyangz seiz lwgnyez gou……（Vei Cijyauz raiz

Luz Lilanz hoiz）