Ngoenzneix gou gangj aen goj neix, dwg aen goj raeujrub fatseng youq seizdoeng.

Seizdoeng ngoenz ndeu banringzgvaq, gyoengq doengzhag cungj lij lumj duznyaen iq ndang rengz sawj mbouj liux nei, couh suenq ninz roengz lo, hix laeuh ok gij manzgyaengq daeuj. Yawj, seizneix gij fwngz iq gyoengqde laeglemx daj ndaw moeg iet okdaeuj, seizhaenx gij din iq dik moeg okbae, mizseiz baez fan ndang, daengx aen ndang couh rengx rumznit liux……

Ngoenzde, Veiz lauxsae guenj dou ninzringz. Gou laep da dwk, dinghdingh ninz youq gwnz congz, baez fan ndang, yawjraen Veiz lauxsae ngaem gyaeuj gaij cozyez, mbouj seiz ngiengx gyaeuj cazyawj dou. Aen cung ndaw gyausiz yiengj digdaeg mbouj geij nanz, couh cienz ok gij sing miz gvilwd gyoengq doengzhag diemheiq lo.

Seizneix, Veiz lauxsae ndwn hwnjdaeuj, sohsoh byaij gvaqdaeuj coh gou. Gou laihnaeuz de raen gou mbouj caengz ninz ndaek, lienzmuengz veq naj. Siengj mbouj daengz, de byaij gvaq henz ndang gou, bang boux doengzhag henz gou hoemq moeg, liux le youh cienq ndang byaij daengz henz congz boux doengzhag wnq, menhmenh gaem din moeg，siujsim sisi mbe hawj moeg bingz, gij dungcoz de mbaeumbwt lumjbaenz mbouj miz saek di sing. Lwgda de cim faj din loh ok ndaw moeg daeuj haenx, de loq gungj hwet, dawz faj din haenx menhmenh soengq dauq ndaw moeg bae. Seizhaenx, gou roxnyinh Veiz lauxsae couh lumj geu ndit ndeu, ciuq rongh gyausiz liux.

“Dawz gij fwngz haeuj ndaw moeg bae, baenz yienghneix couh raeuj lo.” Seizneix, Veiz lauxsae byaij daengz henz ndang gou, gaem gij fwngz gou, unqswnh soengq haeuj ndaw moeg bae. Gij dungcoz de mbaeumbwt baenz maz, lumjbaenz lau vaih gij loq gyaeundei gou. Riengzlaeng, de youh saeqsim nengh moeg hawj gou, saedbauj rumznit mbouj ndonj ndaej haeuj laj moeg bae. Seizhaenx, gou roxnyinh Veiz lauxsae lumj daxmeh gou ityiengh gyaez gou. Faenh gyaez neix couh lumj raq heiqraeuj ndeu, daj gyangfwngz gou menhmenh cienz daengz daengx ndang, hawj gou roxnyinh daengz gij raeuj gaxgonq mbouj miz gvaq neix.

Ngoenzde, gou ninz youq laj moeg raeujrubrub, ninz diemzsubsub loq fangzhwnz. Gou ngeix, gijneix mboujgag dwg fan moeg raeujrubrub ndeu, fan moeg cang rim gyaez ndeu, lij dwg gij cingz lauxsae caeuq hagseng ciuhvunz nanz lumz ndeu. Gij cingz neix baet beuj liux seiznithaenq, lij lumjbaenz raemx iq seizcin nyinh raeuj ndang raeuz.

（Dungz Gaijcwngz raiz Veiz Yen’gyangz hoiz）