Mwh cuengqgyaj, dou baenz ranz vunz bae youz. Yawjraen daxboh dax- meh baez cat sinhfwncwng couh ndaej riengjret niemhbiuq lo, naengh gauh- dez le, gou couh naeuzhawj bohmeh gou siengj banh sinhfwncwng. Daxboh daxmeh doq sangjsad dapwngq lo.

Aen ndwen gonq, daxboh daiq gou daeuj daengz gungh’anhgiz banh sinhfwncwng. Youq ndaw dinghung, boux daxheiz ndeu riunyumnyum dakdaih dou. De ciepaeu bonj bouhhugouj gou, youq gwnz dennauj fwngz seuqsedsed guhhong, loeghaeuj gij saenqsik gou, guh ndaej le doiq gou naeuz:“Siuj baengzyoux, mwngz bae ingjsiengq ndaej lo.”

Sim gou diuqbubbub yamq haeuj aen ranzingjsiengq bae. “Siuj baengz- youx, naengh gizneix!” Cangh- ingjsiengq vixvix aendaengq cungq- gyang haenx, heuh gou naengh. Gou riengjret byaij bae, naengh youq gwnz daengq, yawjyawj aen gyaeujgingq, youh vueng youh angq. “Gaej yaep da, it, ngeih, sam!” Cij dingqnyi “gaca”sing ndeu, cangh’ingjsiengq naenx roengz gvaimwnz. “Siuj baengzyoux, ndaej lo!” Dingqnyi cangh’ingjsiengq baenzneix naeuz, gou angq raixcaix, hozngeiz: Dozsiengq ingj ndaej lo, mbatneix ndaej aeu sinhfwncwng loba!

Laihnaeuz ndaej sikhaek lingx- aeu sinhfwncwng lo, byawz rox, daxboh youh daiq gou bae loeg luzfwngz. Gou geizheih cam: “Gwnz sinhfwncwng mbouj dwg miz doz- siengq gou ha, vihmaz lij yaekaeu loeg luzfwngz ne?” Daxboh naeuz: “Loeg luzfwngz dwg demgya caengz an’onj baujcang he, fuengzre sinhfwncwng ngaiz vunz caeg yungh.” Laxlawz yienghneix, gou fwt roxyiuj ngaekngaek gyaeuj.

Aen ndwen ndeu gvaqbae lo, gou ngoenzneix cingqcaen lingx ndaej sinhfwncwng lo. Gou sijsaeq ngonz- yawj sinhfwncwng, gwnz sinhfwncwng gou naj riunyumnyum, gagsaenq rimmwdmwd. Gou loqsiengj hwnj- daeuj: Miz sinhfwncwng le, gou bae youz, yawjngonz bozvuzgvanj couh fuengbienh lai lo; gou lij ndaej aeu sinhfwncwng, bae ngaenzhangz dawz gij cienznyokmaj gou rom hwnjdaeuj ne!

Daxboh raen gij yienghceij angqvauvau gou, naeuz: “Miz sinhfwncwng le, couh dwg naeuz mwngz ndaej engqgya fuengbienh vaiqvet yiengjsouh gak cungj gunghgung fuzvu guekgya daezhawj haenx, doengzseiz hix yaekaeu rapdawz gij cwzyin caeuq yivu doxdaengj de. Youq guekgya bungq- daengz hojnanz caeuq yungyiemj seiz, dou wnggai cizgiz yiengjwngq hauqcau, vih gij onjdingh、 fazcanj caeuq hoenghvuengh guekgya soengq- hawj ligliengh. Mwngz aeu dawz ndei sinhfwncwng, engq aeu guh boux gunghminz ndiepgyaez guekcoj, vwnzmingz soujgij ndeu.” Dingq gij vah daxboh le, gou roxnyinh mbaw sinhfwncwng ndaw fwngz naek- numnum——Neix mboujdan dwg mbaw gaj ndeu, engq dwg faenh cwzyin caeuq dangrap ndeu ha!

(Cinz Couhyenj raiz

Yinj Fuzgen hoiz)