Byai singhgiz, lauxsae anbaiz dou ma ranz guh cungj cozyez ndeu—— guh hongranz. Gou laeglemx hot ndaet gaemxgienz: Bingzseiz daxmeh cungj naeuz gou ndaej ungjcungh lai, baez neix gou itdingh aeu guh ndei yiengh hongranz ndeu, hawj daxmeh roxdaengz, gou mbouj caiq dwg boux lwgnyez “rox gwn mbouj rox guh” ndeu!

Guh gijmaz hongranz cij baenz ne? Singhgiz roek haetromh, gou youq ndaw ranz byaij guhcaemz. Daeuj daengz yangzdaiz, gou yawjraen doiq giuzhaiz singhgiz gaxgonq dwkgiuz sat swnhfwngz cuengq youq gizgox haenx, ndaw sim miz cawjeiq lo. “Gou couh saeg giuzhaiz ba!” Gangj le, gou vaxdawz giuzhaiz, doq cung bae funghdajswiq.

Singhgiz gonq mwh dwkgiuz doek di fwn he, haiz cungj nem naez rim bae. Yawj doiq giuzhaiz uqatat neix, gou saekseiz mbouj rox baenzlawz bae saeg de. Siengj daengz daxmeh baeznaengz saeg buhvaq, cungj dawz buhvaq cuengq youq ndaw bat cimq raemx yaep ndeu, saeg giuzhaiz hix yaek cimq yaep ndeu ha? Gou hainduj ngeix: Doiq giuzhaiz neix uq naez lai, danghnaeuz cimq de youq ndaw bat, raemx ndaw bat haengjdingh uq liux bae, wngdang baenzlawz guh ne? Gou fwt singjsag gvaqdaeuj, giuzhaiz couh lumj aen doxgaiq dajcoux ndeu, gou raix raemx haeuj ndaw haiz bae caemh baenz ho! Siengj daengz couh guh, gou sikhaek aeu bat daeuj, raix di genjsaegbuh caeuq raemx coq ndaw bat, ndau yinz le, siujsim sisi aeu gij raemx gyaux ndei haenx raix roengz ndaw haiz bae. Raemx menhmenh iemq ok najhaiz, nyumx doengh gij diemjraiz uq gwnz haiz baenz saekhenjndaem.

Gvaq yaep ndeu, gou gag gujsuenq, wnggai ndaej cat haiz lo. Gou yot demhhaiz okdaeuj gonq, yungh fagcat catcat geij baez, sikhaek cat ok le baenz dong fugfauz iq saekmong, riengzlaeng aeu raemx cungdongj, gaiq demhhaiz haxbaenh lij uqatat haenx doq bienq ndaej yienghsiengq moqsak lo. Couh yienghneix, ndaw haiz rog haiz gou cungj cat dwk seuqsatsat bae. Gou dawz doiq giuzhaiz saeg seuq haenx langh youq gwnz yangzdaiz giz ndit ceiq haenq, angqfwngfwng dwk siengj: Daxmeh yawjraen doiq giuzhaiz gou saeg ndaej seuqsatsat neix, itdingh haenh gou.

Banringz, gou daeuj daengz yangzdaiz, yawjraen najhaiz saekhau bu rim le diemjraiz henj. “Gou mingzmingz saeg giuzhaiz seuq lo, vihmaz lij miz doengh gij diemjraiz yakyawj neix?” Gou simgip hemq hwnjdaeuj. Dingqnyi sing’yaem gou, daxmeh byaij gvaqdaeuj, riu naeuz: “Langh haizhau, danghnaeuz duk caengz ceijgaen ndeu, haiz hawq le couh bienq hau haujlai.” Daxmeh doq gangj, doq aeu baengzuet daeuj uet haiz, doeklaeng yot ok ceijgaen, duk giuzhaiz hwnjdaeuj.

Banhaemh, giuzhaiz langh hawq, dawz ceijgaen deuz, diemjraiz caen bienq myox dahraix, giuzhaiz cix hau lumj haizmoq nei. Saeg haiz lij miz cungj banhfap ndei neix, caen dwg gvaq saedceij seiqlengq ndaej hawj vunz hag gvai!(Cangh Cinyui raiz

Lij Siulingz hoiz)