Henz daihloh miz go va’gveiq iqnyaetnyaet ndeu caeuq go faexcoengz sanghung ndeu.

Haetromh, faexcoengz cungj ndaej dak daengz geu nditndat nduj; banringz, gyoengqvunz foenfoen haeuj laj faexcoengz bae yietliengz; banhaemh, gij roeg haeuj rongz haenx cungj haengj youq gwnz faexcoengz saetdiuq. Gova’gveiq muenghyawj gocoengz, hozhaenz naeuz: “Danghnaeuz gou hix did ndaej baenzneix sanghung, couh ndaej yawjraen gizdieg gyae’gyae bae lo.” Gocoengz saeuj nyefaex ngednged, singmbaeu naeuz: “Gova’gveiq, gaej yungh hozhaenz gou, gij heiqrang mwngz ndaej biu daengz gizdieg gyae- gyae bae.” “Hoeng gou lij dwg siengj yawjyawj gizgyae, bae gak dieg youzcet.” Gova’gveiq doq naeuz doq muenghcoh dieggyae, dawz ragfaex baek roengz ndaw namh laeglaeg bae.

Ngoenz banringz he, song laeq lwgnyezsai ing youq laj gova’gveiq naengh dwk. Laeq lwgsai daenj buhndaw o haenx biengj bonj saw ndeu, rumz ci dwk mbawsaw yiengjsasa. “Mwngz yawj, gij ndaundeiq gwnz diegsa Ganhsuz Mingzsahsanh lumj mbouj lumj naedgim?” Lingh laeq lwgsai fwngz vix mbaw dozsiengq ndaw saw cam. Gova’gveiq ngawhngwdngwd muenghyawj gij dozsiengq gwnz saw: Ndoengfaex gwnz ndoinae fwjmok hoenzngeungeu, gij raemxhaij osumsum haenx mued gvaq diegsa, gizgyae aen byadat ndeu youq laj ndit banhaemh longz hwnj ronghgim……De gag damzbyedbyed: “Danghnaeuz gij heiqrang gou ndaej bienqbaenz fajfwed, daiq gou bae gizgyae ndaw saw neix, geijlai ndei ha!”

Vahyaem ngamq sat, gij va’gveiq gimmyanmyan haenx couh mbinfoenfoen roengzdaeuj, gyoengqde suekdawz nditndat, daemj baenz benq baengzmuq rangfwd ndeu, mbaeumbengmbeng daklaih gova- gveiq. Gova’gveiq ngauznged mbawfaex, swnh rumz mbin gvaq diuz Dahcangzgyangh raemxlangh fubfab haenx, mbin gvaq diuz Cangzcwngz ngutngut ngaungau haenx, youq gwnz diegnywj hung Huhlunzbeiwj gvangq- langh lublub haenx angqyangz baenq hop ndeu le, youh youq diegsa langhlublub haenx ndekroengz benq heuswdswd ndeu……

Banhwnz, gova’gveiq muengh- yawj aen ronghndwen vanvan haenx, sawqmwh siengj daengz gij cienznaeuz Dahcangzngoz mbin hwnj ronghndwen haenx. “Gwnz ronghndwen caen miz gova’gveiq lwi?” Couh youq seizneix, gizgyae cienz daeuj gij sing huqhemq gyoengqvunz——Ciujcenz Veisingh Fazse Cunghsinh rongh lumj doengxngoenz, youq ndaw sing vunz dauj geq seiz ndawde, aen hojcen gwnz ndang veh miz nye va’gveiq haenx bongh hwnj gwnzmbwn. Gova’gveiq saeujsaeuj aenndang, bienqbaenz duj va’gveiq ndeu, mbin daengz gwnz hojcen bae, hix bienqbaenz gwnz nye va’gveiq haenx ndawde duj ndeu.

Doeklaeng, youq gwnz rongh- ndwen, naed ceh ndeu laeglemx ok ngaz did mbaw, hai ok le baenz duj baenz duj va’gveiq gimmyanmyan.

(Cuh Gvanyangz raiz

Yinj Fuzgen hoiz)