Ngoenzde, ndit rongh mbwn gvengq, gou yamqdin riengjret byaij ma ranz. Ngoenzneix dwg ngoenzseng daxgoeng, gou yaek soengq baez doeksaet angq ndeu hawj de.

Daxgoeng daengx ciuh guh nazreih, seiqvunz de cungj youq ndaw reih ndaw naz cae hwnj rauq roengz youh ndaem youh ndai. Naengnoh de deng dak ndaej ndaemndongq, cib lwgfwngz de lwglwg cungj hwnj aen daw nanwt. Ndwen gvaq ndwen bi gvaq bi, naj de nyaeuqnyat liux, hoeng cehda cix cungj dwg youh ndongq youh raeh, fajnaj swnzsienh youh dwggyaez, hawj vunz roxnyinh hwet soh sim dingh.

Seiz lwgnyez, gou couh dwg duz malwg riengzlaeng, baenz ngoenz cungj riengzlaeng daxgoeng. Daxgoeng bae guh nazreih, gou couh naengh youq gwnz haenznaz dinreih, doq yawj daxgoeng guhhong, doq nyiem gij rum gij va bangxhenz, dinghdingh caj de. Daengngoenz doek roengz bya le, ndithaemh saj gwnzdeih rim, daxgoeng couh song fwngz cocat umj gou haeuj rungj, gangj aen gojgaeq seizcoz de hawj gou dingq. Doenghgij gojgaeq de, miz guhhong sinhoj, miz cingzndiep huzndei ranznden, lijmiz de baenzlawz haengj gvaq ndwenngoenz…… Duenh seizgan haenx, gvaq ndaej youh vaiq youh angq. Aenvih ndaej caeuq daxgoeng guhdoih gwnyouq, gou couh lumj yienghyiengh cungj miz, ndaw sim cungj mbouj you mbouj heiq.

Daxgoeng miz maz doxgaiq ndei cungj louz hawj gou, ngoenzneix gou ndaej bang daxgoeng guh gijmaz ne? Gou youh ndaej bang dax- goeng guh gijmaz ne? Gou fwt siengj daengz, haizbaengz daxgoeng gaenq daenj le haujlai bi lo, daejhaiz cungj byoengq lo hix sij mbouj ndaej vuenh gouh moq. Mboengq- gonq, gou caeuq daxgoeng bae haw, daxgoeng cung’eiq gouh haiznaeng ndeu, hoeng baez yawj gyaqcienz, de youh cuengq roengz lo. Seizhaenx, gou couh caegcaeg roengz gietsim, itdingh rom cienz bang daxgoeng cawx gouh haiznaeng neix. Ngoenzneix gou couh cawx gouh haiznaeng neix hawj de!

Gou aeu gij cienzlingz bingzseiz mbaet gwn mbaet yungh rom ndaej haenx, caeuq daxboh daengz gwnz haw bae, cawx gouh haiznaeng haenx ma.

Seiz gou riuj gouh haiznaeng moq haeuj dou ranz, daxgoeng youq ndaw hongh coih faggvak. Dingqnyi yamqdin gou, ngiengx gyaeuj raen gouh haiznaeng ndaw fwngz gou, de sien lawq yaep he, lumj miz di doeksaet, riengzlaeng naj riunyeih lo. De yaeng’yaeng ciep gvaq haiznaeng, lumhlumh najhaiz, yawj le youh dauq yawj, nambyoedbyoed naeuz: “Lan gvai gou, lan gvai gou, caencaen dwg lan gvai gou!”

Mbwn fuemx le, daengx ranz vunz homh naengh dwk, nauhnauh yiedyied angqhoh ngoenzseng daxgoeng. Gwnz daiz baij rim byaeknoh feihgwn caeuq mbagau rangfwt, labcuk dawzyupyup, angj faj- faj naj angqbwngbwng haenx. Daxgoeng daenj gouh haiznaeng gou soengq hawj de, naengh youq naj daiz, saenzheiq dangqmaz. De caeuq vunz ndaw ranz miz gangj miz riu, da ndongqrikrik, naj hai angjwt. Ngonz raen daxgoeng yienghneix sim’angq, gou rim dungx rim hoz cungj dwg angqyangz miznaj.

(Linz Yinhdungz raiz

Huz Bangjhangz hoiz)