Banhaet ngeih nyied, rumznit gyaengjgyat, gou dam yiengjsouh ninzgvaiz geij faencung, caiq ndiu dauq seiz, gaenq yaek caet diemj lo. Aen seizgan neix sawj gou fwt singj liux, gipmuengz cat heuj swiq naj, hix goq mbouj ndaej gwn ngaizhaet, couh cungcung muengzmuengz bae hagdangz lo. Byaij daengz buenqroen, aendungx euqgeuz yiengjgugu, gou goemq dungx dwk, mbouj rox yienghlawz banh, youq seizdoeng miz di siliengz neix, gou mbouj rox ra byawz bang gou. Sawqmwh, gou nyouq daengz raq heiqrang ndeu, nyeux gyaeuj yawj bae, dwg aendiemq gai ngaizhaet ndeu. Gou gig siengj bae cawx di gwn, hoeng ndang mbouj faen ngaenz, cijndaej dungx iek lo.

Seizneix, mehlauxbanj aendiemq gai ngaizhaet haeujsim daengz gou lo, raen gou yienghneix le, vad fwngz coh gou, hemq naeuz: “Dahniq, mwngz gvaqdaeuj yaep ndeu!” Gou mbouj rox de yaek guh gijmaz, ngeizvaeg dwk byaij gvaqbae. Mehlauxbanj cam gou: “Dahniq ha, yawj yiengh mwngz, wnggai dwg caengz gwn ngaizhaet ba?” Gou ngaekngaek gyaeuj. De lumj naemj gijmaz nei, doeklaeng mbouj yaemhywx saek di cienq ndang, daj loengznaengj laengndang genj aen bau hung ndeu, youh aeu boi gienghduh ndatfwdfwd ndeu, riengjret dwk bau ndei, ndenq hawj gou, naeuz: “Gij ngaizhaet neix mwngz aeu bae gyangroen gwn nw!” Gou sikhaek roxnyinh gvaqeiq mbouj bae: “Mehsimj，gou cix mbouj ngaenz hawj mwngz ho!” Mehlauxbanj caenciet riu naeuz: “Mbouj youqgaenj nw, gou mbouj sou ngaenz mwngz, couh dangq gou soengq hawj mwngz lo. Mwngz gwn imq le yaek ndeindei doegsaw bw!” Gij vah soh neix baek haeuj sim gou, aen ndangdaej youh nit youh iek gou fwt raeujrubrub hwnjdaeuj. Gyo- mbaiq de le, gou muenghmuengh aendiemq gai ngaizhaet neix, gaemz hung gwngawq aenbau, ndoetndawq gienghduh, bae hwnjdangz lo.

Laxlawz, daj gwnz ndang vunzseng, gou hix ndaej gamjsouh daengz gij sim’eiq raeujrubrub.

( Gu Gyahyih raiz

Nungz Cinfung hoiz)