Vunzmbwk biz vueng dwk song mbiengj henz rwz cungj dwg hanh, “Mwngz…… Mwngz hawj geijlai?”

“Haj cien.” Daxmeh Vangz Meijyen ngiengx gyaeuj yawj gwnz dingj ranz mbouj muenx dwk naeuz.

“Noix lai lo, dahnuengx ha.” Vunzmbwk biz naeuz, “ceiqnoix hawj fanh maenz ha.”

“Mbouj aeu, deuz! Raeuz bae gizwnq cawx.” Daxmeh Vangz Meijyen fwngzswix gaem fwngz Liuz Fanghfangh, fwngzgvaz rag fwngz Vangz Meijyen yamq hung coh rog dou bae.

“Aeu lo aeu lo.” Vunzmbwk biz lumj daej nei gouz naeuz.

Song dah lwgnyez daengx roengzdaeuj, deng daxmeh Vangz Meijyen haenqrengz rag deuz, Vunzmbwk biz niujned niujned ndang moumeh laeh daeuj, song dah lwgnyez nyeux gyaeuj raen gij yienghsiengq hojlienz youh dwgriu, “haj cien couh haj cien, gai hawj sou lo.”

Song dah lwgnyez daengx roengzdaeuj beng fwngz daxmeh Vangz Meijyen, mbouj yungh beng fwngz daxmeh Vangz Meijyen de hix daengx roengzdaeuj le, gij yienghceij lumj mbouj nyienh’eiq saek di, haj cien maenz lai lo, haxbaenh hab gangj sam cien ndei lo, de miz di ienqhoij.

Vunzmbwk biz dwg gikdoengh roxnaeuz doeknaiq ngaemjngaemj caemjcaemj geqhoj：“Beixnuengx goembonj mbouj gangj lo， dingz ndeu dwg soengq hawj sou lo, miz dingzlai saw cikap nanz le……”

Liuz Fanghfangh naeuz:“Bae ra daeh daeuj cang ha.”

Vunzmbwk biz roengz lajlaeuz ra daeh.

Ngoenzsinghgiz, gyoengqvunz daeuj yawj saw、 cawx saw gig lai, Liuz Fanghfangh caeuq Vangz Meijyen youq henz dongsaw henhoh, mbouj hawj vunz daeuj doengh saw.

Boux Vunzcungnienz sang ndeu byaij gvaqdaeuj, miz di geizheih, song dah lwgnyez cawx hauhneix lai saw. “Siujbaengzyoux, daeuj bang hagdangz cawx saw?” De riunyumnyum cam.

Vangz Meijyen naeuz:“Dou hix mbouj dwg lauxsae, vihmaz bang hagdangz cawx saw?”

Vunzcungnienz roxnyinh dah lwgnyez neix miz di mbouj doengz vunzlai, youh cam:“Sou cawx hauhneix lai saw, yawj daengz seizlawz caengh liux ni.”

Liuz Fanghfangh naeuz:“Yawj saw dwg ciuh ndeu. Lumj gwn haeux, mwngz gwn haeux dwg gwn ciuh ndeu mbouj? ”

（26）