Mbwn mbouj miz lwgda,

Hawj naz raihraih dek，

Dou dwg duz roegfek,

Lek dai laj gyangngoenz.

Gyangngoenz ndat lumj feiz,

Mbawreiz remj baenz daeuh，

Muengh fwn fwn mbouj daeuj,

Gwn haeux gaz saihoz.

Roek ndwen mbouj doek fwn,

Gwn haeux cungj ngeix raemx，

Gou doiq mbwn mwngz haemq（cam）,

Haemhlawz fwn cij daengz?

Heuh mbwn mbwn mbouj han,

Cam deih deih mbouj gangj，

Raeuz mbouj ndaej dai ndangj,

Rangj max bae ra raemx.

Dangjyenz daiqdaeuz bae，

Gyae’gyae cungj aeu byaij，

Ngoenz bae hwnz cix vaij（daengz）,

Naiqnaiq caiq miz rengz.

Gvaq cib lueg gouj bo,

Ho bae caiq ho dauq,

Miz daeuzmbanj lingjdauj，

Haujlai vunz okrengz.

Suhgi haeuj daengx mbanj,

Ganj naeuz gyoengq vunzlai,

Mbouj hawj gohaeux dai,

Vaiqvaiq bae dingjrengx.

Mbwnrengx aeu gaggouq,

Caeuq vunzlai okrengz，

Caek raemx lumj youz bengz,

Hamj geng rag mbouj ngaih.

Suhgi daengz ndaw naz,

Raemxda laevang’vang，

Suhgi doiq raeuz gangj,

Ganghan（dingjrengx） aeu hoenx hingz.

Roengz congh caeuraemx daeuj,

Gohaeux ndaej dauqseng，

Bouxdaeuz guh ndaej deng,

Ganghan（dingjrengx） rengz caen daih.