Gonq raeuz caengz gaijgwz，

Ngoenzngoenz miz doxdaeuq，

Ciengx seiq duz bit naeuh，

Couh naeuz baufazhu.

Gaijgwz hailangh daeuj，

Dangj raeuz siu gaihgiz，

Swlei(seiqloih) caiq ndi miz，

Aeu fazliz（faplwd） daeuj gyaeng.

Caiq ndi miz swlei(seiqloih)，

Vunz deihvih doxdoengz，

Bouxboux sim youq soeng，

Caiq ndi deng dik dub.

Miz goengfou couh hai，

Caiq ndi baen haenzhen，

Biengz miz hong cien fanh，

Mwngz uk fan couh buek.

Mwngz banh ndaej gunghswh，

Anbaiz vunz guhhong，

Ndwen ciuq fat cienzgoeng，

Youh coengh mwngz canhbauj.

Daengz le nienzgeij laux，

Youh dauq miz cienz lingx，

Geq daengz miz ngaenz yungh，

Fungcuk gvaq ciuhvunz.

Mwngz naengz banh gunghcangj，

Bang anbaiz vunzlw，

Ndi baen goeng dem swh，

Gwn daenj youq doengz ndei.

Mwngz naengz bau haigvangq，

Gihgai cang ndaw rog（lueg），

Hwnz ngoenz feibauq dok，

Gvangq ok caeq gvaq bya.

Mwngz naengz daiq vunzhong，

Baengh song da bae yeix，

Baengh song fwngz bae ceij，

Ndi seih boux gwn boux.

Doxyaeng bae guhhong，

Cienz daengz ndwen ciuq fat，

Mbouj bik youh mbouj ap，

Habfap bouxboux riengz(gyaez).

Hai mwngz caih ciengx mou，

Muengh hawj sou fatcaiz，

Hai mwngz ciengx cwz vaiz，

Gai ndaej mwngz couh fouq.

Hai mwngz bae haifat，

Bae hai dat daj sa，

Hai mwngz bae ciengx bya，

Gvaengh dah ma guh daemz.

Hai loh mwngz bae bau，

Gauhdez ndaej bae lingx，

Ciuq dozceij bae gvingx，

Cingq ndaej cienz baenz fanh.

Miz daegngongz ndi rox，

Guh byoq ciuz ndi ndei，

Youq gwnz vangjloz cei，

Neix song giz faenvaq.

De guhhong fatcaiz，

Raeuz wnggai goenghoh，

Neix ndwi dwg bozsoz，

Faplwd hoh boux gaenx.

Ciuhneix boux miz ngaenz，

Caenh dwg uk de lig，

Cwngcwz de ndi vit，

Faplwd cix baujhoh.

Gungz liux geij cien bei(bi)，

Ciuhneix ndaej gaijgwz，

Gauj fazcanj ginghci，

Saedceij ndaej vuenyungz.