Baihlaeng ranzmbanj, miz diuz rij iq raemx saw raen daej ndeu, haenx dwg aen suenangq seiznyez gou.

Diuz rij iq gig feuz, giz ceiq laeg cix hamj mbouj gvaq gyaeujhoq gou. Goenj rinmaxluenz youq laj daej rij hix yawj ndaej cingcuj, bya iq、nyauh youq gyang rinmaxluenz doxndoj. Seizhah, duzgoep ceiq maij bae henz rij iq ciengq go, aenvih diuzrij raemx laevauvau neix cungj gig mizsim bang gyoengqde buenxciengq.

Geiqndaej mwh doeg youwzyenz, moix bi sujgyaj gou cungj aeu caeuq daxboh ma ranzmbanj. Baez ma daengz ranzmbanj, gou couh dingj mbouj ndaej rag daxboh, iu gobiuj caeuq nuengxbiuj, daiq muengx dwkbya、doengjraemx daengj, angqvauvau dwk buet bae rij iq. Daeuj daengz henz rij, dou goq mbouj ndaej vid gavaq, couh diuq roengz rij bae caij raemx guhcaemz. Raemxrij lumh din gou, gamjdaengz liengzsisi, gij ndat hwngq cungj bienq liengz lo.

“Lauz bya lo!” Guhcaemz le haujlai nanz, daxboh riuhaha daezsingj dou. “Daeuj lo!” Gou caeuq nuengxbiuj singhung han, gig vaiq couh buet daengz henz rij, daj ndaw doengjraemx dawz aen gyoengz- muengx caepcawq lauz bya. Gou sijsaeq cazyawj, giz liz gou mbouj gyae, miz bang bya iq ndeu comz youq henz goenj rin, couh rag nuengxbiuj coemj gvaqbae, gaem aen gyoengzmuengx haenx luenh lauz. Gobiuj ganjvaiq heuh dou daengx:“Sou cungj haep bya deuz liux lo, baenzlawz lauz ndaej bya ne?” Nuengxbiuj gaeu gyaeuj cam:“Yienghneix baenzlawz lauz bya ne?” Gobiuj saenzmaed riu, naeuz:“Yawj gou!” Gangj le, de dawz fan muengx dwkbya ndeu okdaeuj, heuh gou caeuq nuengxbiuj boux gaem song gyaeuj, youq donh rij baihlaj bu hai, yienzhaeuh heuh dou rag fan muengx dwkbya menhmenh byaij hwnj donh rij baihgwnz bae. Dou siujsim lili dwk yamq din, lwgda gaenjcieng cimyawj gwnz raemx. Gij bya iq ndaw rij haenx lumj cuengqsoeng mbouj singjgaeh lo, gig vaiq couh haeuj muengx dou daeuj. Gvaq yaep ndeu, dou couh lauz ndaej haj roek duz bya iq.

Lauz bya sat le, dou youh youq ndaw rij iq ra gij rinmaxluenz gyaeundei. Gou moix ra ndaej ndaek rinmaxluenz simgyaez ndeu, couh angqyangz dwk, yaengx sang hwnjdaeuj hawj daihgya yawjyawj. Hoeng nuengxbiuj yaep ndeu gip hwnj goenj rinmaxluenz neix, yaep ndeu youh cuengq goenj rinmaxluenz haenx roengzdaeuj, nauhbod naeuz:“Goenj rin neix hix ndeiyawj, goenj rin haenx hix ndeiyawj, dauqdaej genj goenj lawz ne?” O, rinmaxluenz ndaw rij iq, goenjgoenj cungj lumj deng vunz aeu fouj gyak gvaq nei, saenzgeiz dangqmaz!

Mbwn menhmenh laep lo, dou sij mbouj ndaej bae ranz. Diuz rij iq youh hoizfuk caemdingh lo, cij miz ronghndwen ronghsagsag ciuq youq gwnz raemx.

Diuz rij iq ranzmbanj gou, couxdawz gij seizgan mbouj you haenx, itcig lae youq ndaw sim gou.

(Cwngh Yimungz raiz

Veiz Cwngzgij hoiz)