Seizcin, mbwn ngamq rongh, gou caeuq daiq daeuj daengz Dunghhih Cunh ra byaekngaih. Go’ngaih dwg hauhlawz yiengh ni? Mwh lij youq ranz, gou youq gwnz vangj caz gvaq swhliu, gou rox go’ngaih gij mbaw de mbej lumj bwnbit bwngaeq nei, gwnz mbaw dwg saek heumong, laeng mbaw hwnj miz bwnnyungz saek haumong, baenz go mup hwnjdaeuj miz heiq rang daegbied. Swhliu lij sij naeuz, go’ngaih ndi dan ndaej aeu ma guh ceizngaih, lij ndaej guh yw, ndaej yw haujlai bingh ne!

Mwh youq gwnz roen, ndaw sim gou muengh ndei dangqmaz, ndaw uk gou ngvanh naeuz dauqcawq cungj hwnj rim go’ngaih, rumz iq ci gyoengqde baij bae bi dauq, ci ok baenz caengz baenz caengz heuswdswd. Rumz ci gvaqdaeuj, mwh aen ndaeng gou mup daengz gij heiq namh, gou caeuq yahdaiq gaenq ndwn youq gwnz dwngjnaz Dunghhih Cunh. “Daiq, go lawz dwg go’ngaih ne?” Gou gaeu gyaeuj cam naeuz. Yahdaiq riu han gou naeuz: “Mwngz caz gvaq swhliu, mwngz gag sawq ra.” Gou maeuq roengzdaeuj, ngeixdauq go- ngaih dwg baenzlawz yiengh, ciuq gij yiengh de bae ra, hoeng gou yawjraen gij mbaw doengh go rum haenx, mbouj dwg saeq lai couh dwg mbouj miz gij heiqrang daegbied. Gou vueng lo, beng gokbuh yahdaiq cam naeuz: “Daiq ha, gizneix mbouj miz go’ngaih ni!” Yahdaiq riunyumnyum, vix caz rum hai va ndeu naeuz: “Go neix dwg go’ngaih vahenj, hix dwg cungj go- ngaih ndeu, de ndaej aeu ma guh gyaujswj byaekngaih, caemh feihgwn bw!” Gou buet daengz baihnaj caz rum hai va haenx, maeuq youq bangxhenz sijsaeq yawj go’ngaih vahenj. Mbaw ngaih vahenj gij bien de lumj deng vunz sijsaeq raed gvaq, gwnz mbaw dwg saek mong heuoiq; gij va de caemh dwg saek henjoiq, ndeiyawj raixcaix.

Gvaqringz le, nditndat manh yaek dai, dou daeuj daengz aen mbanj ndeu yietnaiq. Gou doeng yawjyawj sae gyaepgyaep, sawqmwh yawjraen gokciengz miz baq rum ndeu, gou raen gij mbaw de najsug dangqmaz, caeuq gou youq gwnz vangj yawjraen gij mbaw go’ngaih doxdoengz liux. Gou byaij gvaqbae mup le mup, cungj heiqrang daegbied ndeu doq ndonj haeuj ndaw ndaeng gou bae. Gou gig angq, hemq naeuz: “Daiq ha, go neix dwg mbouj dwg go’ngaih ne?” Yahdaiq daeuj daengz gizgyawj yawj le, ceh da riu lumj ndwen ngaeu naeuz: “Dwg ha, go neix couh dwg go’ngaih.” Baenznanz le cij ndaej ra raen go’ngaih, gou gik- doengh dwk diuq hwnjdaeuj. Gou youq mwnq de mbaet byaekngaih, sim’angq dangqmaz, gig vaiq cix cang rim lamz ndeu lo.

Gwnz loh ma ranz, gou siujsim lili umj aen lamz cang byaekngaih rim haenx, lumj ndaej umj seizcin youq ndaw rungj nei. Mup daengz gij heiq- rang byaekngaih, ndaw uk gou hainduj siengj daengz le gij feih mwh gou haeb aen ceizngaih, gij hamh duhhoengz muz yungz haenx conh okdaeuj, diemzsubsub vannyumnyum……

（Cangh Yijcinz sij

Veiz Munglingz hoiz）